دوو لە سێی حەشیمەتی بێکاری پارێزگای سنە دەرچووانی زانکۆن

ئامارە ڕەسمییەکان دەڵێن دوو لە سێی حەشیمەتی بێکاری پارێزگای سنە دەرچووانی زانکۆن.
ئەحمەد رەشیدی، بەڕێوەبەری گشتیی تەعاون، کارو خۆشبژیویی کۆمەڵایەتیی پارێزگای سنە لە هەشتەمین کۆبوونەوەی هاوئاهەنگ‌کردنی ئیدارەکان وێڕای ئاماژە بەوەی پارێزگای سنە یەک میلیۆن‌و ٥٠٠ هەزار کەس حەشیمەتی هەیە، گوتی کە دوو لە سێی حەشیمەتی بێکاری پارێزگای سنە دەرچووانی زانکۆن.
ئەو نرخی بەشداریی ئابووریی پارێزگای سنەی سەدی ٤١ باس کردوەو دەڵێ بەپێی ئامارە ڕەسمییەکان نرخی بێکاری لە پارێزگای سنە کەمتر لە سەدی ١٣ یە، بەڵام هەر بۆ خۆی لە درێژەدا دان بەوە دادەنێ کە بەپێی ڕای کارناسان‌و هەروەها ئەوەی بە چاو لەو پارێزگایە دەبیندرێ، دەبێ نرخی بێکاری سەروو سەدی ٣٠ بێ.
ڕەشیدی لە درێژەدا گوتی کەمکردنەوە لە نرخی بێکاری هەواڵدان بۆ خوڵقاندنی هەلی کارەو ئەوەش پێویستیی بە سەرمایەدانان‌و وەبەرهێنان هەیە، بەڵام تا ئێستا پڕۆژەی وەبەرهێنانی ئاوا گەورە لە پارێزگای سنە وەگەڕنەخراوە تا لەسەر کەمکردنەوەی ئاماری بێکاری کاریگەری دابنێ.
ئەو لە درێژەدا بە ئاماژە بەوەی پارێزگای سنە زەرفییەت‌و توانای ئەوەی زۆرە کاری وەبەرهێنانی لێ بکرێ، گوتی ٢٣٠ کیلومیتر سنووری هاوبەش لەگەڵ هەرێمی کوردستان، سێ بازاڕچەی سەرسنوور، هەبوونی کانگاو کانزای ژێرزەویی زۆرو زەوەند تەنیا بەشێک لە زەرفییەتەکانی پارێزگای سنە بۆ وەبەرهێنانە کە تا ئێستا کەلکی لێ وەرنەگیراوە.
بەڕێوەبەری گشتیی تەعاون، کارو خۆشبژیویی کۆمەڵایەتیی پارێزگای سنە گوتی سەدی 3 ی هەموو کانگا سروشتییەکانی ئێران لە پارێزگای سنە هەڵکەوتووە، بەڵام بەجێی دانانی کارخانەو ئیمکاناتی پێویست بۆ وەبەرهێنان‌و کارخولقێنی هەموو کانگا بەردییەکان لە کوردستان خاوفرۆش دەکرێن.
ئەو بە ئاماژە بەوەی دوو لە سێی حەشیمەتی بێکاری پارێزگای سنە دەرچووانی زانکۆن، گوتی دەبێ هەموو ساڵێ ١٧٥٠٠ هەلی کاری لە پارێزگای سنە دروست بکرێ بۆ ئەوەی نرخی بێکاری لەوە زیاتر نەچێتە سەر، بەڵام ئەوە لە توانای دەوڵەت‌دا نییەو هەر بەپێی نرخی ساڵی ٩٠ بۆ کارخوڵقێنی لە پارێزگای سنە تەرخانکردنی ٥٢٥٠ میلیارد تمەن سەرمایە پێویستە.