“محەممەد نووریزاد” کە ئێستا لە یەکێک لە زیندانەکانی کۆماری ئیسلامییدا بەسەر دەبا چەند نهێنییەکی سەبارەت بە یەکێک لە بکوژانی تێرۆری دوکتور قاسملوو باس کردوە.
نووریزاد دەڵێ: “وەرزشوانێکی ئێرانی بە هۆی باس کردن و ئاشکرا کردنی زانیاری لە سەر یەکێک لە بکوژە تێرۆریستەکانی دوکتور “قاسملوو” لە هەموو چالاکییەکی وەرزشی بێبەش کراوە.”
بە پێی وتووێژێکی دەنگیی “محەممەد نووریزاد” کە لە زیندانەوە قسە دەکا، وەرزشوانی بەناوبانگی ئێرانی “عەلی دایی” کە پاش دەرکردنی لە تیمی تۆپی پێی “سایپا” لە لایەن کەسێک بە ناوی “مستەفا مۆدەبێر”ەوە و پاشان ئاشکرا کردنی ناوی ڕاستەقینەی مستەفا مۆدەبێر لە لایەن ئەو وەرزشوانەوە، بە کاردانەوە بەو کارانەی “عەلی دایی” ناوبراویان لە هەموو چالاکییەکی وەرزشی بێبەش کردوە.
“محەممەد نووریزاد”، باس لەوە دەکا کە “مستەفا مۆدەبێر”، وەکوو بەرپرسی تیمی فووتباڵی سایپای تاران هەر وەکوو عەلی داییش ئاماژەی پێ کردبوو ناوی “غەفوور دەرجەزیی دوولەق” بووە و وەکوو بەرپرسی حەراسەتی دەنگ و ڕەنگی کۆماری ئیسلامیی کاری کردوە و پێش لەوەش ناوی “ئەمیر مەنسوور بۆزۆرگیان” بووە کە سەردارێکی سپای پاسدارانی ڕێژیم بووە، وەکوو تێرۆریستێک دەستی لە تێرۆری ڕێبەرانی کورد و چەندین کەسی دیکەشدا هەبووە.
شایانی باسە کە خاوەنی ئەو ٣ ناوە کە ئێستا وەکوو “مستەفا مۆدەبێر” دەناسرێت بکوژی دوکتور”عەبدولڕەحمان قاسملوو” بووە و، هەروەها لە پەروەندەی تێرۆری دوکتور”سادق شەرەفکەندی”ـیشدا ناوی “ئەمیر مەنسوور بۆزۆرگیان” کە هەر هەمان مستەفا مۆدەبێرە هاتوە و وەکوو یەکێک لە بکوژانی دوکتور شەرەفکەندی ناوی براوە.
جێگای ئاماژەیە کە بۆ ئاشکرا نەبوونی ناوبراو کۆماری ئیسلامیی ئێران ٣ جار ناوی گۆڕیوە و پلە و پایەی جۆراوجۆری لە ئێراندا پێ داوە کە هیچ شارەزاییەکی لەو بابەتانەدا نەبووە، بە تایبەت ناوبراو کە بکوژێکی جینایەتکار و پاسدارێکی مرۆڤ کوژە و هیچ لە کاروباری وەرزشی نازانێ، وەکوو بەرپرسی تیمێکی تۆپی پێ و چەندین بەرپرسیارەتیی گرینگی دیکە دیاری کردوە.
نووریزاد دەڵێ: مستەفا مۆدەبێر هەر ئەو کەسەیە کە بە دەمانچە تەقەی لە سەری دوکتور قاسملوو کردوە کە بۆ بەدەستهێنانی ئاشتیانەی مافی کورد لە گەڵ کۆماری ئیسلامیدا لە ویەن خەریکی وتووێژ بوو.
ئاشکرا کردنی ناوی مستەفا مۆدەبێر وەکوو بکوژ و جینایەتکارێکی کۆماری ئیسلامیی ئێران لە لایەن وەرزشوانێکی بە ناوبانگەوە کۆماری ئیسلامیی ئێرانی تووڕە کردوە و ئەگەر پێگەی کۆمەڵایەتیی و خەڵکیی عەلی دایی نەبوایە بێگومان بەشێوەیەکی بێبەزەییانە دەیان کوشت.
