بەشێکی بەرچاو لە شاخەوانانی گرووپە شاخەوانییەکانی کوردستان بە بەڕێوە بردنی چەند چالاکییەک یادی شەهیدانی ژیوایی پاوەیان بەرز ڕاگرت.
ڕۆژی هەینی ٢٠ـی پووشپەڕی ٩٩ی هەتاوی، بە دەیان کەس لە گرووپی شاخەوانیی “بیناری” زێوە بە سەر کێوی “داڵانپەڕ” سەرکەوتن و بە هەڵگرتنی وێنە و دروشمی تایبەت بە شەهیدانی ژینگەی ژیوایی پاوە یادی ئەم شەهیدانەیان بەرز ڕاگرت.
هەروەها کۆمەڵێک لە ژینگەپارێزانی پیرانشار بۆ لووتکەی کێوی “بووزی سینا” لە ناوچەی مەرگەوەڕی ورمێ بە مەبەستی ڕێزلێنان و بەرزڕاگرتنی یادی شەهیدانی ژینگە بە دروشمی “ئەندێشەی هەرمانی سەوزتان، مەشخەڵی ڕێگەی پیرۆزمانە” چالاکییەکیان بەڕێوە برد.
لە لایەکی تر و هەمان ڕۆژ شاخەوانانی گرووپی کەشوانی پاوە و ئەنجومەنی ژیوایی پاوە بە یەکەوە چالاکییەکیان بەرەو کێوی “یەخچاڵ”ـی هەمەدان بە یادی شەهیدانی ژینگەی نیشتمان بەڕێوە برد و هەروەها شاخەوانانی یانەی شاخەوانیی پاوە و گرووپی شاخەوانیی “نووری”ـی پاوە و گرووپی شاخەوانیی قەندیلی ڕوانسەر لە چالاکییەکدا بە سەرکەوتن بەسەر کێوی “حوی” پیرانشار یاد و ناوی شەهیدانی ژینگەیان بەرز ڕاگرت.
جێی ئاماژەیە، ڕۆژی چوارشەممە ٨ـی پووشپەڕی ٩٩ی هەتاوی سێ ژینگەپارێزی ئەندامی ژیوایی پاوە بە ناوەکانی “موختار خەندانی، بیلال ئەمینی و یاسین کەریمی” لە کاتێکدا هەوڵی کوژاندنەوەی ئاگری دارستانەکانی بووزین و مەرەخێڵی پاوەیان دەدا لە ئاگردا سووتان و گیانیان لەدەست دا، هەر بەم بۆنەیەوە کەسانی دڵسۆز و چالاکان و ئەندامانی ئەنجومەن و ڕێکخراوەکان بە بەڕێوە بردنی چەندین چالاکیی جۆربەجۆر و هەروەها سەردانی گڵکۆی شەهیدان یادی ئەم شەهیدانەیان کردەوە.