به‌ڕێوه‌چوونی پرێس کۆنفرانسی خەڵاتی ئەدەبیی ئیبراهیم یوونسی لە کافە کاڵ بەڕێوە چوو

له‌ بانه‌و له‌ “کافه‌ کاڵ” ی ئه‌و شاره‌ پرێس کۆنفرانسی خەڵاتی ئەدەبیی ئیبراهیم یوونسی بەڕێوەچوو.
ڕۆژی سێشەممە، ١٢ی گەڵاڕێزان، بە ئامادەبوونی کۆمەڵێکی بەرچاو لە هەواڵنێران‌و میدیاکاران، هەندێ لە کاربەدەستان‌و بەرپرسانی فەرهەنگیی کوردستان‌و شارەدار و شۆرای شاری بانە، پرێس کۆنفرانسێک بۆ یەکەم خەڵاتیی ئەدەبیی کتێبیی کوردیی ئیبراهیم یونسی لە کافە کتێبی کاڵ بەڕێوە چوو.
لەم پرێس کۆنفرانسەدا کە لە لایەن هەواڵنێران‌و میدیاکارانەوە پیشوازییەکی شایانی لێ کرا، موهەندس بابەک، رۆستەم پوور شارەداری بانە؛ حاجی وریا وسووقی، سەرۆکی شۆرای شاری بانە؛ شەوبۆ محەمەدیانی، سەرۆکی کۆمیسیۆنی فەرهەنگیی شۆرای شاری بانەو بەڕێوەبەری خەڵاتی یونسی باسیان لە پشتگیریی خۆیان بۆ خەڵاتەکە کردو هیوایان خواست لە ساڵانی داهاتووش‌دا بەردەوامیی ببێ.
له‌ بڕگه‌یه‌کی دیکه‌ی ئه‌و پرێس‌کۆنفڕانسه‌دا دوکتۆر ئیسماعیل ئەحمەدی؛ بەرپرسی کتێبخانەکانی پارێزگای سنه‌و دوکتور ئومید وەرزەندە؛ بەرپرسی ناوەندی کوردستانناسیی زانکۆی ئازادی کوردستان، وێڕای ڕێز لێنان لە هەوڵ‌و کۆششەکانی دوکتۆر ئیبراهیم یونسی، دامەزراندنی ئەم خەڵاتەیان بە کارێکی گرنگ نرخاندو هیوایان خواست کە یارمەتیدەر بێ بۆ پەرەپێدان بە کتێب‌و کتێب خوێندنەوە.
لە بەشی کۆتایی پرێس کۆنفرانسەکەش‌دا سێ کەس لە ئەندامانی لیژنەی زانستیی خەڵات؛ بەیان عەزیزی، محەمەد مەحموودی‌و فریا یۆنسی، بە نوێنەرایەتیی لیژنەی زانستیی خەڵات، وەڵامی پرسیاری میدیاکارانیان دایەوەو تیشکیان خستە سەر پرۆسەی هەڵبژاردنی داوەرو مەرجەکان‌و شێوازی بەشداری‌و چۆنیەتیی ئاراستەکردنی خەڵاتەکە.
شایانی باسە جگە لەم سێ کەسە ، لێژنەی زانستی خەڵاتی کتێبی کوردی لە عەتا نەهایی، حامید کۆنەپۆشی، ئەمجەد غوڵامی و ڕەحیم عەبدولڕەحیم‌زادە پێک دێ.
پێویستە بگوترێ، ئەمساڵ بۆ یەکەم جار خەڵاتی ئەدەبیی کتێبی کوردیی ئیبراهیم یۆنسی، بە پشتگیریی شۆرای شار‌و شارەداریی بانە، لە ئاستی کوردستان‌دا برێوە دەچێ.