ڕۆژی هەینی سپای پاسدارانی کۆماری ئیسلامیی ئێران بە گوللە شوانێکیان لە کوێستانەکانی گوندی “وێزە”ی شارۆچکەی چۆمان بریندار کرد.
بە پێی هەواڵی هەواڵدەریی ڕووداو و لەسەر زاری موختاری گوندی وێزە، لە کوێستانی “کانیەڕەشی” ئەو گوندە سپای پاسدارانی کۆماری ئیسلامیی ئێران بە بیکەیسی تەقەیان لە شوانێکی ١٧ ساڵان بە ناوی”ڕێبین ئیسماعیل” کە سەرقاڵی لەوەڕاندنی ڕانەمەڕەکەی بووە کردوە.
“ئەحمەد گەڵاڵی”، بەڕێوەبەری تەندروستیی چۆمان لەو بارەوە ڕاگەیاندوە دوای گەیشتنی بریندارەکە بە نەخۆشخانەی چۆمان دواتر ڕەوانەی هەولێر کرا، چونکە گولـلە بەر قاچی ڕاستی کەوتبوو و پێویستی بە نەشتەرگەریی بوو.
شایانی باسە کە هەر بە پێی ئەو سەرچاوەیە ڕۆژی چوارشەممە ١١ی پووشپەڕی ٩٩ی هەتاوی، لە هەمان کوێستانی کانیەڕەش، ئێران بە دۆشکە تەقەی لە ڕانەمەڕێک کرد و بیست سەری کوشت.
شایانی باسە کە کۆماری ئیسلامیی ئێران بە بێ هیچ پاساو و بیانوویەک لە سەر سنوورەکان ڕاستەوخۆ تەقە لە خەڵکی کورد دەکا و ڕۆژ نییە کەس یان کەسانێک بەدەستی هێزەکانی کۆماری ئیسلامیی ئێران لەسەر سنوورەکانی کوردستان گیانیان لەدەست نەدەن.
