شاخەوانانی شاری دیواندەرە بۆ ڕێزگرتن لە شەهیدانی ژینگەپارێزی ژیوای پاوە چالاکییەکیان بەڕێوەبرد.
ڕۆژی هەینی، ١٣ی پووشپەڕی ١٣٩٩ی هەتاوی گرووپێک لە شاخەوانانی “چلچەمە”ی دیواندەرە بۆ ڕێزگرتن لە یادی شەهیدانی ژینگەپارێزی پاوە بەسەر لووتکەی”هەوازۆ” لە ڕۆژئاوای دیواندەرە سەرکەوتن.
لەو چالاکییەدا گرووپی شاخەوانانی دیواندەرە بە هەڵگرتنی وێنە و تراکتی تایبەت بە شەهیدانی ژینگەپارێز و بەڕێوەبردنی چەند چالاکییەک یادی ئەم شەهیدانەیان بەرز ڕاگرت و بۆ جارێکی تر پەیمانیان نوێ کردەوە کە درێژەدەری ڕێگەیان بن و لە پاراستن و خۆشەویستی بۆ نیشتمان و ژینگەی کوردستان درێغی نەکەن.
شایانی باسە، ڕۆژی یەکشەممە ٨ـی پووشپەڕی ١٣٩٩ی هەتاوی پۆلێک لە ژینگەپارێزانی ژیوای پاوە لە کاتی کوژاندنەوەی ئاگری دارستانەکانی “بووزین و مەرەخێل”ـدا لە ئاگردا سووتان و لە نێویاندا سێ ژینگە پارێز بە ناوەکانی “موختار خەندانی، یاسین کەریمی و بیلال ئەمینی”، گیانیان لەدەست داو چەند ژینگە پارێزێکی تریش بریندار بوون و هەر بەم بۆنەیەوە بەشێکی بەرچاو لە ئەنجومەن و ڕێکخراوە مەدەنییەکان و خەڵکی دڵسۆز و نیشتمانپەروەر بە بڵاوکردنەوەی ڕاگەیەندراو و هەروەها چالاکی جۆراوجۆر یادی ئەو شەهیدانەیان کردەوە.