ئەنجومەنی پارێزەرانی ژینگەی بەڕووی زاگرۆس لە سەردەشت بە بۆنەی شەهید بوونی سێ چالاکی ژینگەپارێزی ژیوای پاوە پەیامێکیان بڵاو کردەوە.
دەقی پەیامەکە بەم شێوەیەیە:
وایە… بە شەهید بوونی هەر شەریفێک دایکی بە شەڕەفی نیشتمان بەرۆکی پارچەپارچە بووی خۆی هێندەی دی دادەڕێ و
دڵی پڕ لە گڕی زاگرۆس دەهەژێ و بە قورسی ڕادەچڵەکێ و باڵای شاهۆ و قەندیل و نەکەرۆز دێتە لەرزین و، ڕوخساری دارستان و بەن و دەوەن و ڕووی بەڕووی سەوز ڕەش پۆش دەبێ.
بەڵام ئیرادەی لاوان و ئاشقانی ژینگە و سروشت بەهێزتر و ورەی هەڵسووڕانی کوردستان لە پێناو پاراستنی شاخ و داخ و دارستانی لێوانلێو لە داستانی زێد و وڵات بەرزتر دەبێ…
بەڵێ دڵی هەر مرۆڤێک بۆ کۆچ و کۆچ باری بیلالە دەلال و دڵ چەرمگەکان و یاسین و موختارە پەسەند و ئیختیار کراوەکان چڕی کووڵ و پڕی خەم و تەم دەبێ، بەڵام بە دیتنی زوڵاڵ و ڕوون و سووری خوێنیان وەک لێزمە و ڕێژنەی باران و بەهار و گرڤە و لرڤەی چۆم و ڕووباڕ بانگ و ئاهەنگی سەرهەڵدانەوە و ژیان و ژوان و هۆرە و هاوارێکی پڕ لە هومێد و هیوا دەلاوێنێ و قاپ و وێنەی ئەوینێکی نوێ و نەخش و نیگاری هێز و حەزێکی سەوز و تازە لە سەر زەوین دەنەخشێنێت.
بەڵێ…
پووشپەڕ مانگی پەڕینی سەوزی دەشت و چیا و داپۆشرانی سەر و ژوور بە پووش و پەڵاش و بڵاو بوونەوەی بۆنی سیر و خەردەل و لیمۆ و چڕەدووکەڵ لە شار و بنار و هەوار و فڕینی ڕووحی کوردی بێ سووچ و تاوان و هاتنەوە قەتار نەمان و شەمەندەفەری خەمان بۆ سەر کوردان دیسان هاتەوە و دووبارە هەوری ڕەش و گرژی مەینەت وڵاتی داپۆشی و تەمی باراند و تەڕی تاسە و حەسرەتی خەستی خستە مەڵبەند و نێوبەندی دڵی جەماوەری کوردستان بەتایبەتی و گشت گەلانی ناوچەکە و جیهان.
ئێمە وەک پارێزەرانی بەڕووی زاگرۆس لە سەردەشت وێڕای دەربڕینی پرسە و سەرەخۆشی و هاوخەمی خۆمان لە گەڵ بنەماڵەی شەهیدان “بیلال ئەمینی، یاسین کەریمی و موختار خەندانی” و هاوسەنگەرانی شەهیدانی سەوزی تازە و ڕابردووی بناری شاهۆ و مەرخێل و ژینگەپارێزانی ئەنجومەنی ژیوا، دەنگ و ڕەنگی خۆمان هاوئاهەنگ و تێکەڵاوی هەست و هەڵوێستی چڕ و پڕی دڵسۆزانی گەل و هۆز بۆ بەرەنگار بوونەوە لە گەڵ بکوژانی جەنگەڵ و دارستان دەکەین و پێوەندی خۆمان لەگەڵ گەڵا بە گەڵای دارەبەن و دەوەنەکان و دانە بە دانەی بەڕووەکان نوێ دەکەینەوە و عەشق و ئەوین و سۆزمان بۆ پاراستنی ژینگە و پارێزگاری لە سروشتی نشتیمان و گۆڕینی بیر و ڕای نەیاران ڕادەگەیەنین.
ئەنجومەنی پارێزەرانی ژینگەی بەڕووی زاگرۆس (سەردەشت)