ڕێکخراوە مەدەنییەکانی شاری جوانڕۆ بە بۆنەی شەهید بوونی پارێزەرانی ژینگەی مانگی پووشپەڕ ڕاگەیەندراوێکیان بڵاو کردوە.
دەقەی ڕاگەیەندراوەکە بەم شێوەیەیە:
بەناوی بەدیهێنەری ژینگە و ژیان
ئەندێشەی سەوزمان ڕێبەرە
نیشتمان سەوز و بیرمان سەوز و شەهید سەوز و ڕێی داهاتووشمان سوور و گەشە. کۆستەکانمان گەلێک زۆرن کە دەرفەتی ئازیەتییان لێ گرتووین. ئازیەتی ناگرین و بەردەوام دەبین لە پێناوی ژیانی سەوز و داهاتووی گەشدا، ئەمە وانەی شەهیدانی پووشپەڕە ئەو کاتەی لە دوا چرکەساتەکانی ژیاندا بە هێوری و بە هیواوە، چرپاندوویانەتە گوێی خاک و مێژوو و داربەڕووە جەرگ سووتاوەکاندا.
ئەوا دیسان خاکی پیرۆزمان ڕۆڵە بە ئیرادەکانی لە ئامێز دەگرێ. تۆ بڵێی تاسەشکێنی ئیرادەی بەرز و لە بن نەهاتووی ڕۆڵە ئازاکانی نیشتمانی سوتاومان، جگە لە کۆشی گەرمی خاکی پیرۆز چی بێت؟!
لە پاش کۆستێکی تر و بە دڵێکی پڕ لە خوێنەوه پێویستە چییدی ڕێز لە خۆمان بگرین و ئیرادەی ئینسانی و کەرامەتی کوردانەمان بە هیچێک نەگۆڕینەوە.
نیشتمان بکەینە ڕووگەی هیوا و ئێمەش وەکوو شەهیدانمان هەوڵ بدەین ڕۆڵەی بە ئەمەگی خاک بین و لە پێناو گیانی پیرۆزیاندا، هەر کەسە و بە پێی توانا درێژەدەری ڕێگایان بین و نیشتمانمان بپارێزین.
بە هیواین دەستە ڕەش و کاولکەرەکانی ژینگە بە خۆیاندا بێنەوە و چییدی نەبنە هۆی کارەسات و، ئەوەش بزانن کە ئیرادەی مەدەنییانەی نەتەوەکەمان، زۆر بەرز و بەهێزترە لە نەفسی ڕەش و نزمی ئەوان، نیشتمانی ئێمە قەقنەسێکە “لە وەتەی گڕ هەیە ئەسووتێت” و لە پاش هەر کەوتن و سووتانێک بەهێزتر لە جاران هەڵدەستێتە.
لە کۆتاییدا، ڕادەگەیەنین کە خۆمان بە خاوەن پرسە و شینگێڕی برا خۆشەویستەکانی وڵاتمان
((کاک موختار و کاک بیلال و کاک یاسین))
دەزانین و سەرەخۆشیی خۆمان ئاراستەی نیشتمانی دایک و بنەماڵەی داخداریان و هەموو ئینسانێکی خاوەن هەست و هەڵوێست و ئازادیخواز و ژینگەپارێز دەکەین.
پێی ناوێ بۆ شەهیدی وەتەن شیوەن و گرین
نامرن ئەوانەی وا لە دڵی میللەتا ئەژین
________
ئەنجومەنی ئەدەبیی خانای قوبادی
ئەنجومەنی ئەدەبیی مەولەوی
ڕێکخراوی گوتاری نوێ (گفتمان نو)
ڕێکخراوی چرای هزر (چراغ اندیشە)
ئەنجومەنی شانۆ (نمایش)
ئەنجومەنی وێنەگران (عکاسان)
ئەنجومەنی ژینگەپارێزیی ماپریس
ئەنجومەنی مافی شارۆمەندی (حقوق شهروندی)
جوانڕۆ ـ ۹ی پووشپەڕی ساڵی ۱۳۹۹ی هەتاوی