بەردەوامیی مەحکومکردنی بێڕێزی بە کوردەکان لە شارو ناوچەکانی پارێزگای ورمێ

٣٠٠ چالاکی مەدەنیی کورد‌و ئازەری بە شێوەی هاوبەش بێرێزی بە کوردانیان مەحکوم کرد.
دوای ئەوەی چوونی ژمارەیەک لە خزم‌و کەسەکانی فەرهاد پیرۆت‌پور، والیبالیستی کوردی یانەی شارەداریی ورمێ لە ساڵۆنی یاریی ئەو تیمە‌دا، بێڕێزی‌و سووکایەتیی ژمارەیەک لە سەیرکەرانی توندئاژۆی تورکی نێو ساڵۆنەکەی لێ کەوتەوە، سەدان کەس لە چالاکانی مەدەنی‌و سیاسیی کورد‌و ئازەری لەم بارەوە هەڵوێستیان گرت‌و ئەو حەرەکەتە شۆڤینیستییانەیان مەحکووم کرد.
لەو نامە هاوبەشەدا کە ئیمزای ٣٠٠ چالاکی سیاسی لە گەڵە، وێڕای مەحکومکردنی ئەو کردەوە قێزەونە، داکۆکی لە پێکەوەژیانی ئاشتییانەی نەتەوەکانی نیشتەجێ لە پارێزگای ورمێ بە تایبەت دراوسێیەتی دوو نەتەوەی کوردو تورک کردۆتەوە.
نامەکە جۆراوجۆریی نەتەوەیی لەم پارێزگایەی نەک بە هەڕەشە بەڵکوو وەک دەرفەت دەستنیشان کردوەو هەموو نەتەوەو ئایینە جیاوازەکانی بە خاوەنی ئەو پارێزگایە زانیوە. واژۆکەرانی نامەکە هەروەها بانگی سڕینەوەی دووبەرەکی‌و ناکۆکی لەو پارێزگایەیان داوە و رایانگەیاندوە کە هەڵسوکەوتی ئەو ژمارە کەسە بە هەڵوێست‌و هەڵسوکەوتی دانیشتوانی ورمێ یان شوینەکانی دیکە نازانن.