لە درێژەی کێبەرکێکانی زۆرانبازی کە لە شاری ئاتێنی پێتەختی یونان لە ئارا دایە، زۆرانبازانی شارەکانی کرماشان و سەقز لە رۆژهەڵاتی کوردستان درەوشانەوە و توانیان سێ میداڵی زێڕ، دوو میداڵی زێو و دوو میداڵی بڕۆنز دەستەبەر بکەن.
بە پێی زانیاریەکان هەر یەک لە ئازاد عەلیپوور بە کێشی ٦٠ و کورش کەریم زادە بە کێشی ١٣٠ کیلۆ، دوو زۆرانبازی خەڵکی شاری سەقز لە کێبەرکێی جیهانیی وڵاتی یونان میداڵی زێڕیان وەرگرت.
هەروەها سۆهراب رەحمەت ئابادی لە شاری کرماشان و لە کێشی ٦٩ کیلۆ میداڵی زێڕیان بۆخۆیان دەستەبەر کرد.
زاهید هاشمی خەڵکی شاری سنە لە کێشی ٩٧ کیلۆ دا میداڵی زێوی وەرگرت.
هەر لەم پێوەندیەدا سەعید گوڵشەن خەڵکی شاری سەقز کە لە سەر ناوی وڵاتی کانادا بەشداری ئەو کێبەرکێیانە بوو، میداڵی زێوی بۆ خۆی دەستەبەر کرد.
هەر یەک لە داریوش سەیدی و سادقی نەزەری کە لە کرماشانەوە بەشدار بوون پلەی سێهەمیان بە دەست هێنا و میداڵی برۆنزیان وەرگرت.
