کۆڕێکی شیعری بۆ شاعیری کورد قاسم موئهیدزاده ناسراو بە “هه‌ڵۆ” له‌شاری سه‌قز به‌ڕێوه‌چوو.
زانکۆی ئازادی ئیسلامی له شاری سه‌قز، به هاوکاری ئه‌نجومه‌نی مه‌وله‌وی کورد و ئه‌نجومه‌نی په‌یڤ، ئێواره شێعرێکیان بۆ شاعیری کورد قاسم موئهیدزاده سازکرد.
له‌و کۆڕه‌شیعرییه‌دا هه‌ڵۆ، به‌خوێندنه‌وه‌ی هه‌ڵبه‌ست و به‌رهه‌مه شیعرییه‌کانی خۆی ئاماده‌بووانی هێنایه‌جۆش و خرۆش.
که‌سایه‌تییه که‌لتووری و چالاکانی زانستی و هونه‌ری و قوتابیانی ناوچه‌ی سه‌قز پێشوازییه‌کی گه‌رمیان له‌و ئێواره شیعره کرد، هه‌ڵۆ له‌سه‌ر بانگهێشتی زانکۆی ئازادی ئیسلامی یه‌که‌ی سه‌قز له‌هۆڵی کۆبوونه‌وه‌کانی دکتۆر محه‌مه‌د فازلی چه‌ندین پارچه شیعری به‌هه‌ر دوو زمانی کوردی و فارسی خویندەوە.
هه‌ڵبه‌ست و به‌رهه‌مه شیعرییه‌کانی ئەو شاعیرە به زمانه‌کانی کوردی و فارسی و به‌ستایل و شێوازه‌کانی کلاسیک و عه‌رووزی و ئازاد هۆنراوه‌ته‌وه و له کتێبی کۆمه‌ڵه شیعری “برووسکه” چاپ و بڵاوکراوه‌ته‌وه که به‌رهه‌می چه‌ندین ده‌یه هه‌وڵ و داهێنان و خزمه‌ت و چالاکیی ئه‌و له‌بواری فه‌رهه‌نگ و زمان و ئه‌ده‌بیات و شیعری کوردی دایه.
هه‌ڵۆ، مامۆستای خانه‌نشینکراوی ئیداره‌ی په‌روه‌رده‌و بارهێنانی شارستانی مه‌هاباده، هێشتا به‌رهه‌م گه‌لێکی زۆری له‌حاڵی کۆکردنه‌وه‌و ئاماده‌کردن دایه بۆ ئه‌وه‌ی له داهاتوودا چاپ و بڵاوبکرێنه‌وه. ستایلی شیعریی ئه‌و له‌نێو کۆمه‌ڵگای ئه‌ده‌بدۆستی کوردستاندا لایه‌نگرێکی زۆری هه‌یه‌و بابه‌ت و ناوه‌رۆکی شیعره فارسییه‌کانی زیاتر له‌بواری عیرفان و ناوه‌رۆکی شیعره کوردییه‌کانی پێکهاتووه له‌بابه‌ته‌کانی نه‌ته‌وه‌یی، کۆمه‌ڵایه‌تی و ره‌خنه‌یی.
له‌ماوه‌ی ساڵانی کار و چالاکیی ئه‌ده‌بیی خۆیدا چه‌ندین کۆڕ و کۆبوونه‌وه‌ی شیعری سازکردووه، پارچه شیعری “یاره ژیکه‌ڵانه‌که‌م” یه‌کێکه له به‌رهه‌مه جوان و هه‌ره ناسراوه‌کانی ئەو شاعیرە مەهابادییە که له ساڵانی رابردوودا که‌وته‌سه‌ر زاری خه‌ڵکی کوردستان و چه‌ندین جار له‌لایه‌ن هونه‌رمه‌ندان و گۆرانیبێژانی کورد بە مه‌قام و گۆرانی ئاراسته‌کراوه.
