“مەسعوود مەهدەوی”، بەرنوێژی شاری قەزوین بێڕێزی بە ئایینی یارسان کردوە و کاردانەوەی “عەلی قەدەمی”، ئەندامی شۆرای شاری ئەلوەندی لێکەوتەوە.
بە پێی هەواڵێک کە لە کاناڵی تێلێگرامیی “کۆمەڵەی چالاکانی مەدەنیی یارسان” بڵاو بۆتەوە، بەرنوێژی شاری قەزوین لە وتارێکی هەینیدا لەو شارە بێڕێزی بە ئایینی یارسان و شوێنکەوتوانی ئەو ئایینە دەکا و دەڵێ: “هەرکەس یارسانی بێ گڵاوە و نابێ موسوڵمانەکان نزیکیان بکەونەوە”.
ئەم قسانەی مەسعوود مەهدەوی کاردانەوەی یەکێک لە ئەندامانی شۆرای شاری ئەلوەند “عەلی قەدەمی” لەو پارێزگایە لێکەوتەوە کە شوێنکەوتووی ئایینی یارسانە و ئەویش لە وڵامدا دەڵێ: “هەرکەس یارسانی بە گڵاو ناو دەبا خۆی گڵاوە”. لە ئاکامی سکاڵای بەرنوێژی قەزوین لە عەلی قەدەمی ناوبراو بە لێدانی ٤٠ قامچی سزا دەدرێ.
شایانی باسە کە بێڕیزی و هەڵاواردنی ڕەگەزی و مەزهەبی و نەتەوەیی لە ئێرانی بندەسەڵاتی کۆماری ئیسلامیی ئێراندا دیاردەیەکی ئاشکرا و سیستماتیکە و ڕۆژانە بەشێوەی جۆراوجۆر بێڕێزی بە خەڵک و بیروباوەڕی خەڵک دەکرێ.
جێگای ئاماژەیە کە ئەم بێڕێزییەی مەسعوودی مەهدەوی و سزادانی عەلی قەدەمی ناڕەزایەتیی چالاکانی مەدەنی کورد و پەیڕەوانی یارسانی لێکەوتۆتەوە و کەمپەینێک لە ژێرناوی “خەڵکی یارسان پشتیوانی قەدەمی”یە لە تۆڕە کۆمەڵایەتییەکاندا بۆ ئەم مەبەستە وەڕێ خراوە.