کاتژمێرەکەی ژوورەکەم چرک چرک لە خولانەوەی خۆی‌دایە، شەوێکی تاریک و ئەنگوستەچاوە، دنیا کش و ماتە، خەو لە چاوەکانم زڕاوە، شەپۆلەکانی خەیاڵ ھەر جارە و بەرەو کەنارێ لە خیزەڵان و تاوێرە بەردە تیژەکان توڕم دەدەن، ژوانی شەوانم نێو دێڕی کتێبەکان و شاکارە وێنەکانی ئاڵبۆمی پێشمەرگایەتیی نزیکەی چوار دەیە لە خەباتە. دێڕی کتێبەکان دەریای بیر و ھزرم دەوڵەمەند دەکەن و نیگایەک لە وێنەکانی چوار دەیە ئیلهامی نووسینم پێ‌دەبەخشن.
شەوگار درێژە و درێژتر دەبێتەوە، ئێستا لەم شەوەزەنگەدا بەتەواوی ھەست بە لێدانی ترپەی دڵی کاتژمێرەکەم دەکەم، چرک چرک ئارامیی گۆمی مەندی خەیاڵم دەپچڕێنن، ئەمرۆ پێش ئەوەی خۆر دوا ماڵئاوایی لە شەپۆلە ئارامەکانی دەریا بکا، کلیکێک لە سەر فەیسبووکەکەم ژوانی دیدەکانم بوو لەگەڵ شاکارە وێنەیەکی گەلێ جوان. ژوانی دوو نیگا بوو، یەکەمیان پێکەنینەکانی پێشمەرگە بوو کە ختۆکەی خستە دڵمەوە و، ژوانی دووھەمم ڕەوینەوەی پێکەنینی سەر سیما و ڕووخسارم بوو.
بە خیزماڵەکانی خەیاڵمدا داگەڕامەوە بۆ نێو مەتەرێزەکانی خەبات و تێکۆشانی داوێنی چیا، بۆ ئەوکاتانەی پێشمەرگەکان خۆیان گورج و گۆڵ دەکرد و پێکەنین سەرلێوەکانی بەر نەدەدان لە خۆشیی چوونەوەیان بۆ ناوچە .
ھەڵزنان بوو بە سەر تاوێرە بەردەکانی شەخسی مالیمۆس، بەنێو دار تاوک و بەڵاڵووکەکاندا ھەڵگەڕان بەرەو گیاڕەنگ، پشوویەک لەبن گیا کەما و نیگایەک لە گەڵای ڕێواسە پیرەکانی کوێستان و خوڕە خوڕی ئاو ھەڵدێرەکان و توانەوەی بەفری بەر بەڕۆژەکان، ئاودیو بوون بوو لە زەرتک و ھۆمل و بووڵفەت و دەرکەوتنی سەوزە بووکی ناوچەی ئالانی سەردەشت، ھەنارە قەڵشیوەکانی بێتووش و گەرماوان و مەزناوێ و ئاشکان و قندۆڵ و گڕاوانی ھەرزنێ.
بە خەندەکانی شەھید کەریم توژەڵی و کاک حەسەن قەلەڕەشی و پرخەی کاک لوقمان کەسرایی ھەودای خەیاڵم پچڕا و تێر تێر لە نیگای سێ مێرخاسی مەتەرێزی سەخت و دژواری سەردەمی شاخ و پێشمەرگیەتیم ڕوانـــی. لەگەڵ خەندەکاندا دڵم کەوتە جۆلانەی خۆشی و ھێدی ھێدی منیش لەگەڵیان پێدەکەنیم، بزەم دەھاتێ و دادەگەڕامەوە بۆ سەردەمی زێڕینی خەبات لە داوێنی چیا و ھەڵەمووتەکانی نیشتیمان. پێکەنینەکانم لە بەرچنێک دەکردن و بەڕەو غوڕبەت و ئاوابوونی خۆزگە و ھیواکان دەگەڕامەوە.
سەرم لەنێو چۆکەکانم دەگرت و پێلووی چاوەکانم بە دیار ماڵئاوایی پێکەنینەکان وەرزی خەزان و ھاتنی پاییزە گوڵە فرمێسکەکانم بوو. ئەم ھەورە ئاوسانەی فرمێسک چۆن دادەدەنە ڕێژنە و وەرزە پاییزی ئەسرین و خەمە .
ئەی کوا لە کوێن ئەو بەرچنە پێکەنینانەی لەگەڵ خۆم ھێنانمەوە بۆ مەملەکەتە نامۆ و غەریبەکان؟ بۆچی دەبێ پێکەنینەکانیش لەم سەرما و سۆڵەدا گۆڕابن بە فرمێسک و ڕۆندک، بۆچی دەبێ وەرزی کاڵبوونەوەی پێکەنین و ھاتنی وەرزی گریان و خەم بـــــێ. کاتێ سەیری کۆشی خۆمم کرد، پەنجەکانم دروێنەی فرمێسکە گەرمەکانیان دەکرد.
***
ئەمەگ و وەفای کوڕە پێشمەرگەیەکی نێو شۆڕش بۆ ھەمووی ئەوانەی کە ھاوڕێبازی باوکی پێشمەرگەم بوون و بۆ ئەوانەش کە ئەگەر بۆ تەنیا ساتێکیش جلوبەرگی پیرۆزی پێشمەرگەیان پۆشــــــی.
