ڕۆژی یەکشەممە، ڕێکەوتی ٢٥ی جۆزەردانی ١٣٩٩ی هەتاوی، کۆمیتەکانی حیزبی دێموکراتی کوردستان لە وڵاتانی فەرانسە و بریتانیا، لە ڕێگەی ئێنتەرنێت و بە شێوەی ئانلاین سمینارێکی سیاسی – تەشکیلاتیان بۆ بەڕێز “خالید عەزیزی”، سکرتێری گشتیی حیزبی دێموکراتی کوردستان پێکهێنا.
سەرەتای سمینارەکە بە سروودی نەتەوایەتیی ئەی ڕەقیب و خولەکێک بێدەنگی بۆ ڕێزگرتن لە گیانی پاکی شەهیدانی ڕێگای ڕزگاریی کوردستان دەستی پێکرد.
پاشان لە لایەن بەڕێوەبەرانی سمینارەکە هاوڕێیان “هەڵمەت بابۆلی”، بەرپرسی کۆمیتەی حیزب لە فەڕانسە و “ئیدیسۆن فەرامەرزی”، بەرپرسی کۆمیتەی حیزب لە بریتانیا، بەخێرهاتنی بەشداربووان کرا و ئامانج و مەبەستی کۆبوونەوەکە بۆ ئەندامان ڕوون کرایەوە.
دواتر بەڕێز”خالید عەزیزی”، باسێکی لەسەر چەند بابەتی ڕۆژ پێشکەش کرد. بەڕێزیان لە سەرەتای قسەکانیدا گوتی: “ئارەزووم ئەوە بوو ئەگەر پەتای کۆرۆنا نەبوایە لە نزیکەوە لەگەڵ ئێوە و لە کۆبوونەوەیەکی بەرینتردا پێکەوە باس و خواستەکانی ڕۆژمان بخستایە بەر باس ، بەڵام سەرەڕای ئەوەش بە هەوڵ و ماندوو بوونی هاوڕێیانی کۆمیتەی دەرەوەی وڵات توانیومانە لەم ئامرازانە کەلک وەرگرین و ئەم کۆبوونەوەیە پێک بێنین و خۆمان لەگەڵ دۆخەکە بگونجێنین.”
بەڕێزیان لە بەشێکی دیکەی وتەکانیدا بە گرینگی دان بە لێکەوتەکانی پەتای کۆڕۆنا و هەڵسوکەوتی نابەرپرسانەی کۆماری ئیسلامیی ئێران و گرینگی نەدانی بەگیانی خەڵك و بەکارهێنانی ئەو ڤایرۆسە بۆ کێشە سیاسییەکانی نێوخۆ و دەرەوەی کۆماری ئیسلامی، داوای لە هەموو ئەندامانی حیزب و دڵسۆزانی نەتەوەی کورد کرد کە بە هەر شێوەیەك بۆیان دەکرێ، یارمەتیدەر و پشتیوانی گەلی کورد لە ڕۆژهەلاتی کوردستان بن. هەروەها بەڕێزیان ئاماژەی بەوە کرد کە بەداخەوە هاتنی پەتای کۆرۆنا یارمەتیدەر بوو بۆ بەشێکی بەرچاو لە قەیرانەکانی کۆماری ئیسلامی کە لە چل ساڵی ڕابردووی ڕێژیمی کۆماری ئیسلامیی ئێراندا بێوێنە بوون، بە تایبەت کوژرانی “قاسم سلێمانی” و خستنە خوارەوەی فڕۆکەی ئۆکڕاینی و هەروەها زیاد کردنی گەمارۆکانی ئەمریکا و خۆپێشاندانەکانی نێوخۆی ئێران و کوردستان، بۆ ماوەیەکی کورت توانی لەژێر پەتای کۆڕۆنادا دایان پۆشێت.
لە پێوەندی لەگەڵ یەکگرتنەوەی هەر دوو لایەنی دێموکرات بەڕێزیان ئاماژەی بەوە کرد کە هەموومان لەگەڵ یەکگرتنەوەی بنەماڵەی گەورەی دێموکراتین و هەروەها، نابێ یەکگرتنەوە ببێتە موزایدەی سیاسی و گوتی: “لە بواری یەکگرتنەوەدا خۆمان بەقەرزدار نازانین، لەبەر ئەوەی ئێمە زۆر چوینە پێش و تەنانەت لە ناوی حیزب و پۆستی سکرتێری و ئاڕمیشدا. هەمووی ئەوانە نیشاندەری جیددی بوون و گەورەیی حیزبی دێموکراتی کوردستانە، کە بەرژەوندیی نەتەوەیی لە سەرەوەی هەموو ویستەکانمان بووە.”
لە بەشی کۆتایی قسەکانیدا سکرتێری گشتیی حیزب ئاماژەی بەوە کرد، ئێمە وەک حیزبێکی سیاسی لە چوارچێوەی ئێراندا بەدوای کێشە و مافەکانی کورد لە ڕۆژهەلاتدا دەرۆین. ئیمە جیا لە کۆماری ئیسلامیی ئێران لەگەڵ هیچ نەتەوە و حیزب و لایەن و ئایینێك کێشەمان نییە و خۆمان بە دۆستی هەمووان دەزانین و لەگەڵ زۆربەی هەرە زۆریان دانیشتن و دانوسان دەکەین بۆ ڕزگاری گەلەکەمان.
بەشێکی تری کۆبوونەوەکە تەرخان کرا بوو بۆ پرسیار و ڕەخنە و پێشنیارەکانی ئەندامان کە لە لایەن سکرتێری گشتییەوە وڵام درانەوە.
لەبەشی کۆتایی سمینارەکەدا هەریەك لە بەڕێزان “سمایلی شەرەفی”، ئەندامی ڕێبەری و بەرپرسی کۆمیسیۆنی تەشکیلات و هەروەها “حەمەڕەسوڵ کەریمی”، ئەندامی ڕێبەری و بەرپرسی تەشکیلات و نوێنەری حیزب لە دەرەوەی وڵات، سەرنج و تێبینییەکانیان لەسەر هێندێك باس و بابەتی تەشکیلاتی و هەروەها پرسیارەکانی ئەندامان خستنە ڕوو.
