“شۆرش وەکیلی”، دەرهێنەری کوردی خەڵکی شاری کامیاران لە فێستیڤاڵی فیلمی بریتانیا خەڵات کرا.
لە درێژەی سەرکەوتنەکانی لە ئاستی نێودەوڵەتییدا، کورتە فیلمی “لەکە” لە نووسین و دەرهێنانی “شۆڕش وەکیلی”، توانی خەڵاتی فێستیڤاڵی کورتە فیلم لە بریتانیا بباتەوە.
نێوەرۆکی ئەم کورتە فیلمە لەسەر “مافی مرۆڤ و ئاشتییە” کە بە هاوکاریی ئەنجومەنی سینەمای گەنجانی سنە، بەرهەم هاتوە.
جێی ئاماژەیە، ئەم کورتە فیلمە پێشتریش لە چەند وڵاتی تری وەک: هێندوستان، ئەمریکا، کانادا و کرۆواسی خەڵاتی باشترین فیلمی نێونەتەوەیی وەرگرتوە، هەروەها شۆڕش وەکیلی دەرهێنەر و سینەماکاری کوردی خەڵکی کامیاران، خەڵاتی باشترین دەرهێنەری لە فێستیڤاڵی (شەبدیزی کرماشانی)ـی لە ئێران وەرگرتوە.
شایانی باسە، کەم نین ئەو دەرهێنەرە کوردانەی کە ساڵانە لە فێستیڤاڵە جیهانییەکاندا بەشداری دەکەن و بەرهەمەکانیان وەک یەکێک لە باشترین بەرهەمەکانی ئەم فێستیڤاڵە جیهانییانە دیاری دەکرێن و خەڵات وەردەگرن.