“پ ك ك” یه‌کلانه‌یه‌ ئاگربه‌سی کاتیی ڕاگه‌یاند

پارتی كرێكارانی كوردستان لە بەر هەڵبژاردنەكانی پارڵمانی توركیەدا که‌ لە سەرەتای مانگی نۆڤامبردا به‌ڕێوه‌ده‌چێ، ئاگربەسی كاتی ڕاگەیاند.
١٢٦ڕاگەیەندرانی ئاگربەس لە لایەن “پ ك ك” چەند كاتژمێر پاش ئەوە بوو كە ڕۆژی شەممە ڕێكەوتی ١٨ی ڕەزبەر، دوو تەقینەوە دوابەدوای یەك لە وێستگەی شەمەندەفەری ئانكارا، هەر نەبێ ٣٠ كوژراو و برینداری لێ كەوتەو.
چالاكانی چەپ‌و هێزە كوردییەكان لەسەر بانگهێشتی حیزبی دێمۆكراتیكی گەل، HDP و بە مەبەستی ناڕەزایەتیی دەربڕین بە به‌رده‌وامیی توندوتیژییه‌کان لە باكووری كوردستان لەم شوێنە كۆ بوونەوە.
لە بەیاننامەی پارتی كرێكارانی كوردستاندا هاتووە كە “پ ك ك” بە مەبەستی بەڕێوەچوونی هەڵبژاردنەكان لە كەشێكی هێمن‌دا هێرش‌و پەلامارەكانی خۆی بۆ سەر هێزەكانی توركیە ڕادەگرێ. لەم بەیاننامەیەدا ئاماژە بەوەش كراوە كە پ ك ك پلانی هیچ هێرشێکی نابێ، بەڵام بێتوو هێرشی بكرێتە سەر دەست دەكاتەوە‌و بەرگری لە خۆی دەكا.
پاش شكاندنی ئاگربەسی 2 ساڵەی دەوڵەتی توركیە‌و پ ك ك لە مانگی ژوئیەی ٢٠١٥، بۆ جارێكی دیكە توندوتیژی‌و شەڕ و ئاژاوە لە باكووری كوردستان پەرەی سەند. ئەرتەشی توركیە لە ماوەی چەند مانگی ڕابردوودا چەندین جار پەلاماری بنكە‌و بارەگاكانی “پ ك ك”ی لە ناوچه‌ سنوورییه‌کانی هه‌رێمی کوردستان داوە ‌و لە بەرامبەریشدا هێزەكانی پ ك ك چه‌ند جار پەلاماری پۆلیس‌و هێزە نیزامییەكانی توركیەی داوه‌و له‌و ماوه‌یه‌دا سه‌دان که‌س له‌ دوولایه‌ن کوژراون‌و بریندار بوون.