میخاییل بووگدانۆف، نوێنەری تایبەتی سەركۆماری ڕووسیه بۆ كاروباری خۆرهەڵاتی نێوەڕاستو وڵاتانی ئافریقایی، لەگەڵ ساڵح موسلیم ڕێبەری حیزبی دێمۆكراتیكی كوردی سووریە دیداری كرد.
بەپێی ڕاپۆرتی سایتی وەزارەتی دەرەوەی ڕووسیە، تەوەری ئەم دیدارە ڕووبەڕوو بوونەوە لەگەڵ داعش بووە.
پێشتریش “سیپان حەمۆ”، فەرماندەی گشتیی یەكینەكانی پاراستنی گەل، لقی نیزامیی پارتی یەكیەتیی گەلان، داوای لە ڕووسیە كردبوو كە چەكو چۆڵ بۆ هێزەكانی دابین بكاو لەگەڵ هێزە كوردییەكان لە بابەت ڕووبەڕوو بوونەوە و پەلاماردانی گرووپی داعش ڕێك بكەوێ و لەم هێرشانەدا پەلاماری مۆڵگەكانی گرووپی نوسرەش بدا.
لە لایەكی دیكەشەوە ئیدریس ناسان، بەرپرسی پێوەندییەكانی دەرەوەی پارەتی یەكیەتیی گەل لە شاری كۆبانێ دهڵێ: ئێمە ئامادەی هاوكاریكردنی هەموو ئەم لایەنانەین كە لەگەڵ داعش شەڕ دەكەن. ئێمە لە ئێستادا یارمەتی لە ویلایهته یەكگرتووەكانو هێزی پێشمەرگەی ههرێمی كوردستان وەردەگرین.
ئەم داوایەی هێزە كوردییەكانی ڕۆژاوای كوردستان ڕۆژێك پاش ئەوە بووە كە فڕۆكە شەڕكەرەكانی ڕووسیە، لە وڵاتی سووریە دەستیان بە هێرشە ئاسمانییەكانی خۆیان كردووە.
ڕووسیە ڕایگەیاندووە كە مەبەستی لەم دەستێوەردانە شەڕ لەدژی گرووپی داعشە، بەڵام ئهمریکاو بهرهی ڕۆژاوا دهڵێن هێرشی فڕۆكەكانی ڕووسیە بۆسەر بنكەی دژبەرانی میانەڕەوی سووریە بووە كە لە لایەن ئامریكاوە پشتگیری دەكرێن.
وتەبێژی وەزارەتی دەرەوەی ئامریكاش ڕۆژی چوارشەممەی حەوتووی ڕابردوو ڕایگەیاندووە كە تەنیا سەدی 5ی هێرشەكانی ڕووسیە، بۆسەر مۆڵگەی شێوەنیزامییانی داعشو گرووپەگانی سەر بە ئەلقاعیدە بووه.
