بەشێکی بەرچاو لە ژنانی چالاک و ژینگەپارێز لە شاری پیرانشار چالاکییەکی ژینگەپارێزیان بەڕێوەبرد.
ڕۆژی دووشەممە، ١٩ی جۆزەردانی ١٣٩٩ی هەتاوی، ژنانی ژینگەپارێز بە هاوکاریی ڕێکخراوی ژینگەپارێزی پیرانشار، هەڵمەتێکی ئاودانی نەمامیان لە گردی “نەورۆز” بەڕێوەبرد.
لەم پێوەندییەدا ئەنجومەنی ژینگەپارێزی پیرانشار ڕایگەیاندوە به ڕەچاوکردنی ڕۆڵی تایبەت و سەرەکیی ژنان و کەرتی پەروەردە لە کۆمەڵگەدا، بۆ زیاتر جێکەوتنی بیری ژینگەپارێزی لە بنەماڵەدا و بەشی هەستیارتر واتا منداڵەکان، ڕێکخراوی ژینگەپارێزانی پیرانشار زیاتر تیشک دەخاتە سەر خاتوونەکان و ئەم‌جارە ئەو ئەرکە پیرۆزە بە خاتوونەکان سپێردرا و وەکوو هەمووکات سەلماندیان کە ژنان چەندە لە ئەرکەکانیاندا سەرکەوتوون.
هەروەها ئەنجومەنی ژینگەپارێزی پیرانشار، هیوای خواست بە بۆنەی ئەو شێوە هەڵمەتانەوە، خاتوونەکان زیاتر گرینگی بدەن بە پرسی ژینگە و ڕاهێنانی ئەندامانی بنەماڵە و ڕۆڵی خۆیان بۆ چاککردنی ئاشتەوایی ژینگە و ژیان بە باشی بگێڕن.
شایانی باسە، ئەنجومەن و ڕێکخراوە مەدەنییەکان لەسەر دەستی کەسانی دڵسۆز و خەمخۆر، ساڵانە چەندین چالاکیی ئەدەبی، فەرهەنگی و ژینگەپارێزی بەڕێوەدەبەن کە لە هەر یەکێک لەم چالاکییانەدا ژنان پێشەنگن و ڕۆڵی بەرچاویان هەیە و سەلماندوویانە کە شانبەشانی پیاوان لە هەر چەشنە کار و چالاکییەکدا دەتوانن بەشدار و سەرکەوتووبن.
