دەسبەسەرکرانی دوو کەسی خەڵکی “بزوەش”ی کامیاران

دوو کەسی خەڵکی گوندی ” بزوەش”ی کامیاران لەلایەن ناوەندە ئەمنیەتییەکانی رێژیمەوە دەسبەسەر کراون.
بەپێی ڕاپۆرتی پەیامنێری کوردستان‌و کورد گیرانی ئەو دوو کەسە پێوەندی بە کێشەی ئیمام جومعەی کامیاران لەگەڵ خەڵکی گوندی بزوەش لەسەر ئاوی قەناتێکەو مەلا تۆفیق قوربانی بە کەلکی خراپ لە بەرپرسایەتییەکەی دەیەوێ ئەو قەناتە داگیر بکا.
پەیامنێری کوردستان‌و کورد دەڵێ لە کێشەی نێوان ئیمام جومعەی کامیاران‌و خەڵکی گوندی بزوەش‌دا ناوەندە ئەمنیەتییەکان پشتی ئیمام جومعەیان گرتوەو بۆ فشارخستنە سەر خەڵک دوو کەسی ئەو گوندەیان دەسبەسەر کردوە.
بەپێی ئەو ڕاپۆرتە ناوەندە ئەمنیەتییەکان پەروەندە سازیان بۆ محەممەد ڕەشید قوربانی‌و حوسێن قوربانی، ئەو دوو گیراوە کوردە کردوەو تۆمەتی هاوکاری کردنی حیزبە دژبەرەکانی کۆماری ئیسلام‌و چالاکی ئەمنیەتی دژی رێژیمیان داونەتە پاڵ.