بێبه‌شیی منداڵانی دێهلوڕان له‌ پارک‌و که‌ره‌سته‌ی یاری

به‌هۆی نه‌بوونی پارکی گونجاو بۆ منداڵان‌‌و که‌ره‌سته‌ی یاری له‌ پارکه‌کانی دێهلۆڕان له‌ ئیلام، زۆربه‌ی خه‌ڵکی ئه‌و شاره‌و به‌ تایبه‌ت منداڵان له‌ لانیکه‌می ئیمکاناتی ته‌فڕیحی‌و گوزه‌ران بێبه‌شن.
دانیشتوویه‌کی شاری دێهلوڕان ده‌ڵێ شاره‌دارو ئه‌ندامانی شوڕای شار تا ئێستا هیچ گرینگی‌و بایه‌خێکیان به‌ دابینکردنی که‌شی گونجاو بۆ ته‌فریح‌و گوزه‌رانی خه‌ڵکی ئه‌و شاره‌ نییه‌.
که‌سێکی دیکه‌ی خه‌ڵکی ئه‌و شاره‌ ده‌ڵێ ته‌پ‌و تۆزی له‌ ڕاده‌به‌ر له‌و شاره‌ له‌لایه‌ک‌و نه‌بوونی ئیمکاناتی ڕیفاهی‌و ته‌فریحی له‌لایه‌کی دیکه‌ بووه‌ته‌ هۆی ئه‌وه‌ی زۆربه‌ی خه‌ڵک‌و منداڵان هه‌ر له‌ چوارچێوه‌ی ماڵدا بمێننه‌وه‌و له‌ سه‌رقاڵییه‌کی شیاوی خۆیان بێبه‌ش بن.
شاری دێهلوڕان ئه‌گه‌رچی به‌ ڕواڵه‌ت چه‌ند پارکی چووکه‌ی تێدایه‌ به‌ڵام زۆربه‌ی ئه‌و پارکانه جیا له‌وه‌ی که‌مترین ئیمکاناتیان تێدا دابین کراوه‌،‌ به‌ شه‌و ڕووناک نین‌و خه‌ڵکیش له‌ که‌مته‌ر‌خه‌مییه‌کانی شوڕاو شاره‌داری تووڕه‌و ناڕازین.