هێزەکانی پـێشـمەرگە لە بەرەبانی ڕۆژی چوارشەممەوە لە ناوچەکانی باشوورو خۆراوای کەرکوک هێرشیان بۆ سەر داعش لەو ناوچانە بردووەو توانیویانە ٨ گوندی دیکەش لە دەسـتی چەکدارانی داعش ڕزگاربکەن.
هێرشی بە دەستوبردی پێشمەرگەکان بۆ سەر داعش پشتیوانیی ئاسمانیی هێزەکانی هاوپەیمان بە سەرۆکایەتیی ئەمریکای لە پشت بووە.
سەرکەوتنی بەرچاوی هێزەکانی پێشمەرگە و پاشەکشە پێکردن بە داعش بووە هۆی ئەوەی، جان کێری وەزیری دەرەوەی ئەمریکا لە کۆبوونەوەی شوڕای ئەمنیەتی نەتەوە یەکگرتووەکاندا بە مەدحەوە باسی پێشمەرگە بکا.
جان کێری وەزیری دەرەوەی ئەمریکا لە کۆبوونەوەی شوڕای ئەمنیەت‌دا گوتی: ئەمڕۆ پێشمەرگە بە ورەیەکی بەرزەوە و بە هاوکاری هێزەکانی هاوپەیمانان توانیویانە چەندین گوند لە باشووری رۆژئاوای شاری کەرکووک لەژێر دەستی چەکدارانی داعش دەربێنن. وەزیری دەرەوەی ئەمریکا گوتی کوردەکان لەو ناوچانەدا پێشڕەویی بەرچاویان کردوە.
شایانی باسە لەو عەمەلیاتە بەربڵاوەی هێزی پێشمەرگەدا کە توانییان 17 گوندی رۆژئاوای كەركووك رزگار بکەن، بەداخەوە ١٥ پێشمەرگە شەهید و ٢٢ پێشمەرگەش برینداربوون.
