ڕۆژی شەممە، ١٠ی جۆزەردانی ١٣٩٩ی هەتاوی، کۆمیتەکانی حیزبی دێموکراتی کوردستان لە وڵاتانی سویس، ئوتریش، هۆلەند و بێلژیک لە ڕێگای ئینتەرنێت و بە شێوەی ئانلاین بە بەشداری ڕێژەیەکی بەرچاو لە ئەندامانی ئەو چوار وڵاتە کۆبوونەوەیەکی سیاسی – تەشکیلاتیان بۆ بەڕێز “خالید عەزیزی” سکرتێری گشتیی حیزبی دێموکراتی کوردستان پێکهێنا. کۆبوونەوەکە بە سروودی نەتەوایەتی ئەی ڕەقیب و خولەکێک بێ دەنگی بۆ ڕێزگرتن لە گیانی پاکی شەھیدانی کوردستان دەستی پێکرد، پاشان لە لایەن بەڕێوەبەری کۆبوونەوەکە و بەرپرسی کۆمیتەی حیزبی دێموکراتی کوردستان لە وڵاتی سویس کاک “زاهیر قادرحاجی” سمینارەکە کرایەوە و لەلایەن “تەوار ئەبروزەنی” و “حەسەن لاوە” بەخێرھاتنی بەڕێز خالید عەزیزی سکرتێری گشتیی حیزب و بەشدارانی کۆبوونەوەکە کرا.
لە بڕگەی یەکەمی کۆبوونەوەکەدا، بەرێز خالید عەزیزی سکرتێری گشتیی حیزبی دێموکراتی کوردستان سەبارەت بە یەکگرتنەوەی دوو لایەنی دێموکرات و گرینگی یەکگرتنەوە بۆ ئەندامان دوا و ئاماژەی بەوەدا کە هەرلە سەرەتاوە ئێمە لایەنگری یەکگرتنەوە بووین و ئێستاش دوای ١٤ ساڵ هەر لە سەر ئەو بڕیارەین. بە شێوەیەکی وردبینانە هۆکارەکان و کێشەکانی یەک نەگرتنەوەی بۆ بەشداربووان باس کرد. هەروەها ڕایگەیاند تا ئەو جێگایەی پێوەندی بە هەڵوێستی حیزبی دێموکراتی کوردستانەوە هەیە و بە ئەزموونێک کە لە ڕابردوو هەمانە، چارەسەری کێشەی دوو حیزبی دێموکرات بە دەفتەری سیاسی و کۆمیتە مەرکەزی و ڕێبەری وهەڵبژێردراوی کۆنگرەی هەردوو لایەنی دێموکرات دەکرێ. بەڕێزیان ئاوڕیان لە هەستی نیشتیمانی و نەتەوەپەرەستی خەڵکی کوردستان دایەوە کە ڕۆژ بە ڕۆژ لە پەرە گرتن دایە وهەوڵی چالاکانی بوارە جۆراوجۆرەکانی بەرز نرخاند و لە پێوەندی لەگەڵ هەڵبژاردنی مەجلیسی شورای ئیسلامی دا بەشێکی زۆری خەڵک بەشداریان لەم هەڵبژاردنەدا نەکرد و هاوڕابوون لەگەڵ ناوەندی هاوکاری حیزبەکانی ڕۆژهەڵاتی کوردستان. لە پێوەندی لەگەڵ کۆرۆناشدا کە کۆماری ئیسلامی بە سیاسی کردبوو و کەلێنێکی دروست کردبوو، بەڵام لە ڕۆژهەڵاتی کوردستان کە خەڵک ئەزموونێکی باشی لە سازماندان و خۆڕێکستن هەیە بە پێکهینانی ئەنجومەن و ڕێکخراوی جۆراوجۆر بەرەو پیری قەیرانەکە چوون.
بەڕێزعەزیزی لە پێوەندی لەگەڵ ئێرانیەکان کە چۆن هەڵسووکەوت بکەین، ئاماژەی بەوە دا کە حیزبی دێموکرات حیزبێکی میللی و نەتەوەیی لە ڕۆژهەڵاتی کوردستانە و شانازی دامەزرانی هێماکانی نەتەوایەتی کورد لە کۆماری کوردستاندا بە حیزبی دیمۆکراتی کوردستان بڕاوە و بۆیە نەتەوەیی بوون و میللی بوونی ئێمە ڕوون و ئاشکرایە. لە سەر چالاکی سیاسی، بەڕێزیان جەختیان لە سەر ئەوە کردەوە کە پانتایی کاری سیاسی ئێمە ئێرانە و وڵاتەکانی دیکە یا پارچەکانی دیکەی کوردستان نییە و بۆیە پێویستە پێوەندیەکانمان لەگەڵ لایەنەکانی دیکەی ئێرانی بەهێزتر بکەین. ناوبراو دڵنیایی خۆی دەڕبری لەوەی کە بێ کورد کێشەی سیاسی لە داهاتووی ئێراندا چارەسەر ناکرێ.
بڕگەی دووەمی سمینارەکە تەرخان کرابوو بۆ پرسیار و ڕەخنە و پێشنیاری ئەندامانی بەشدار بوو کە لە لایەن کاک خالید عەزیزی بە وردی وڵامیان درایەوە. لە بەشی کۆتایی کۆبوونەوەکە بەڕێز خاتوو “کوێستان گادانی” ئەندامی کۆمیتەی ناوەندی و نوێنەری دەرەوەی وڵات باسێکی لە پێوەندی لەگەڵ تەشکیلاتی دەرەوە پێشکەش کرد و پشتگیری خۆیان لە ئەندامان و کۆمیتەکانی دەرەوەی وڵات ڕاگەیاند و ئامادەیی خۆیانی بۆ پەروەردە و دانانی دەورەی ئاموزشی بۆ ئەندامانی حیزب لە ڕیگای جۆراوجۆرە دەربڕی.
هەروەها بەرپرسانی پێوەندیدار بە کاروباری ئەندامانی حیزب لە دەرەوەی وڵات، بەڕێزان “حەمە ڕەسوڵ کەریمی” بەرپرسی تەشکیلاتی دەرەوەی ولات و “سمایل شەرەفی” بەرپرسی کۆمیسیۆنی تەشکیلات بەشداری سمینارەکە بوون.
