بە بۆنەی ٢١ەمین ساڵیادی دامەزراندنی ئەنجومەنی ژینگەپارێزیی “سەوزی چیا” لە مەریوان چالاکییەکی شاخەوانی بەڕێوەچوو.
ڕۆژی دووشەممە، ٢٩ی بانەمەڕی ١٣٩٩ی هەتاوی بۆ ڕێزلێنان لەچالاکیەکانی ئەنجومەنی “سەوزی چیا” لە ٢١مین ساڵیادی دامەزراندنیدا، و وەفایەک بۆ شەریف باجوەر و هاوڕێیانی، گرووپی شاخەوانی “ماهور” لە مەریوان چالاکییەکی بەڕێوەبرد.
لەو چالاکییەدا لە لایەن بەشێک لە شاخەوانانی ئەم شارە لە “سێف خوارو” بۆ سێ ڕێیانی ” نەچێ” بە دروشمی یادێک لە دڵسۆزانی ژینگە شەریف باجوەر و هاوڕێیانی و هەموو ژینگەپارێزانی وڵات بەڕێوەچوو.
ئەنجومەنی سەوزی چیا کە یەکێک لە ئەنجومەنە چالاکەکانی شاری مەریوانە تەمەنێکی پڕ لە سەروەری، هەوراز و نشێو و پڕ لە دەسکەوت و بارهێنانی تێپەڕاندووە و ئەندامانی ئەو ئەنجوومەنە سەلماندویانە کە ژینگەپارێزی خەباتە و خەباتیش ژیانە.
لەم پێوەدنییەدا ئەنجومەنی “سەوزی چیا” لە ڕاگەیەندراوێکدا باسی لەوە کردوە با یادی ۲۱ ساڵەی چیای سەوز بکەین بە بیانوویەک بۆ پاراستنی ژینگە و نیشتمانمان و بتوانین بە هاوکاری یەکتر کوردستان ئاوەدان بکەینەوە.
هەروەها دەڵێن هاوڕێیانی ئێمە لە ئەنجومەنی سەوزی چیا هەوڵیانداوە بە نرخی گیانیشیان بووبێت نیشتمان و زاگرۆسەکەیان بپارێزن، شەریفانە گیان بدەن تا ئومێدی ژین لە نێو دڵی بەرە و وەچەی ئێستا و داهاتووی کوردستان بنێژن.
