لەگەڵ بڵاوبوونەوەی ڤایرۆسی کۆرۆنا لە ئێراندا و کەمتەرخەمی بەرپرسان بۆ پێشگرتن لەم ڤایرۆسە بووە هۆی تووشبوونی خەڵکێکی زۆر بەم ڤایرۆسە و ژمارەیەکی زۆریش گیانیان لەدەست دا.
لەم پێوەندییەدا پزیشک و کادری دەرمانی و تەندروستییەکان لە نەبوونی خزمەتگوزاری و پێداویستی تەندروستی زۆرترین زیانیان بەرکەوتووە.
بە پێی هەواڵە بڵاوکراوەکان، نزیکەی ٢٣٠٠ کەس لە پزیشکان و کادری دەرمانی لە ئێران تووشی ڤایرۆسەکە بوون و نزیکەی ١٣٠ کەس لەوان گیانیان لەدەست داوە، کە هۆی سەرەکی ئەمەش دەگەڕێتەوە بۆ نەبوونی جلوبەرگ، ئامێر و پێداویستی تایبەت بە پزیشک و پەرستاران لە نەخۆشخانەکان.
هەر لەم پێوەندییەدا “یونس نەورۆزی” یەکێک لەو پزیشکانە بوو کە بەهۆی کۆرناوە گیانی لەدەست دا، پێشتر لە پۆستێکی تایبەتی خۆیدا ڕەخنەی لە لە کەمی جلوبەرگ و پێداویستییە پزیشکییەکان لە نەخۆشخانەکانی ئێراندا گرتبوو.
لە لایەکی تریشەوە ڕۆژنامەی “ئێران” لە ڕاپۆرتێکدا نووسیبووی” پەیوەندی ڕاستەوخۆی پزیشکان و پەرستاران لەگەڵ تووشبوانی کۆرۆنا و نەبوونی خزمەتگوزاری پێویستی تەندروستی هۆکاری سەرەکی تووشبوونی پزیشک و پەرستارانە بە ڤایرۆسەکە”.
هەروەها “بێهرۆز بونیادی” نوێنەری مەجلیسی کۆماری ئیسلامی ڕایگەیاندبوو بەهۆی درەنگ ڕاگەیاندنی بڵاوبوونەوەی کۆرۆنا و سەردانی خەڵک بۆ نەخۆشخانەکان ژمارەیەکی زۆر لە پزیشک و پەرستاران تووشی ڤایرۆسەکە بوون”.
لە لایەکی تریشەوە ” کیانوش جەهانپوور” وەزیری تەندروستی ژمارەی ئەو کەسانەی ئاشکرا کردوە کە بەهۆی خواردنەوەی ئەلکۆلی دەسکرد ژەهراوی بوون و گیانیان لەدەست داوە، ئەو لە ڕاگەیەندراوێکدا کە ڕۆژی دووشەممە ٨ی بانەمەڕ بڵاوی کردەوە ئاماژەی بەوە کرد کە ٥٢٥ کەس بەهۆی خواردنەوەی ئەلکۆلی دەسکردەوە گیانیان لەدەست داوە، ئەمە لە کاتێکدایە کە ناوبراو لە ٢٥ی خاکەلێوەی ئەمساڵدا ڕایگەیاندبوو ژمارەی ئەو کەسانەی بەم هۆیەوە بوونە قوربانی گەیشتووەتە ٧٠٠ کەس.
خواردنەوەی ئەلکۆلی دەسکرد لە ئێراندا بۆ بانگەشەی هێندێک لە فرۆشیاران دەگەڕێتەوە کە بڵاویان کردبۆوە خواردنەوەی ئەلکۆل پێش بە تووشبوون بە ڤایرۆسی کۆرنا دەگرێ و هۆکاری سەرەکی ئەمەش دەگەڕێتەوە بۆ دەسەڵاتێکی حاکم لەو وڵاتەدا کە ناتوانێ پێش بە ساختەکارییەکان بگرێت و ڕێگە چارەیەک بۆ خەڵکەکەی بدۆزێتەوە.