“ئیسماعیل حەمیدییان” چالاکی مەدەنی و هەڵسوڕی بواری ژینگەپارێزی کۆچی دوایی کرد.
ڕۆژی پێنجشەممە، ٢٢ی خاکەلێوەی ١٣٩٩ی هەتاوی، “ئیسماعیل حەمیدییان” نووسەر و چالاکی مەدەنی خەڵکی “سەرابی کارزانی” شاری ئیلام کۆچی دوایی کرد.
ناوبراو حەتووی ڕابردوو لە کێوی “مانشت” ی ئیلام کەوتە خوارەوە و دوای چەند ڕۆژ مانەوە لە نەخۆشخانە بەهۆی سەختی برینەکەیەوە گیانی لەدەست دا.
“ئیسماعیل حەمیدییان” یەکێک لەو ڕۆڵە نیشتمانپەروەرانەی ئیلام بوو کە هەموو کات عاشقی ژینگەی کوردستان بوو، هەروەها لە بەشی زۆری چالاکییە ژینگەپارێزی و فەرهەنگییەکان ڕۆڵی بەرچاوی هەبوو و خزمەتێکی زۆری بە ژینگەی کوردستان و جوانییەکانی زاگرۆس کردبوو.
یەکێک بوو لەو کەسانەی کە بەردەوام لە دژی ئاسمیلەکردنی کوردستان و بە تایبەت شاری ئیلام دەوەستایەوە و لەم پێوندییەشدا بە توندترین شێوە کەوتۆتە ژێر گوشارەکانی دەزگا ئەمنییەکانی کۆماری ئیسلامیی ئێرانەوە.
لە لایەن ناوەندی ڕاگەیاندنی حیزبی دێموکراتی کوردستانەوە بەم بۆنەوە سەرەخۆشی خۆمان لە بنەماڵەی ئیسماعیل حەمیدییان و هەموو خزم و کەسوکاریان دەکەین و خۆمان بە شەریکی خەمیان دەزانین.