بە تاڵانبردنی دارستانەکانی کوردستان بەردەوامە
ژینگەی کوردستان و سەوزایی و لێڕەوارەکانی کوردستان ڕازێنەرەوەی سروشتی جوان و دڵگیری کوردستانن، بەڵام هەر جارە و لە ناوچەیەک وێران دەکرێن و بە تاڵان دەبرێن.
لەمڕۆژانەدا لە ناوچەی سەردشت وەک زۆر ناوچەی دیکەی کوردستان کەسانی هەلپەرەست لە باسکی کۆڵەسە بەشێک لە دارستانەکەیان بڕیوە و بە تاڵانیان بردووە.
لەگەڵ ئەوەی کە هێزە چەکدارەکانی ڕێژیمی کۆماری ئیسلامیی ئێران دەیان ساڵە بۆ مەبەستە سەربازییەکانی خۆیان دارستان و لێڕەوارەکانی کوردستان دەسووتێنن یان بۆ دانانی مۆڵگە و جادەی سەربازی لەنێوی دەبەن، ئەمڕۆ لە کوردستان باندێکی مافیای سەر بە سپای پاسداران بۆ فرۆشتنی دارستانەکانی کوردستان کەوتونەتە بڕینی دارەکان بە تایبەت داری بەڕوو و ڕەوانەی شارەکانی دەرەوەی کوردستانی دەکەن.
لێرەدا ئەرکی ژینگەپارێزان و خەمخۆرانی ژینگە و سروشتی کوردستانە کە ڕێگری بکەن لەم پیلانەی هەلپەرەستان و کەسانی سەر بە باندە مافیاکانی سپای پاسداران و لەقاویان بدەن.