فرۆشتنەوەی باری کاسبکارانی کورد لەلایەن سپای پاسدارانەوە

سپای پاسداران لە مەهاباد ئەو بارو کاڵاو شمەکانەی بەناوی کاڵای قاچاغ دەستی بەسەردا دەگیرێ، لە نێو شارەکانی کوردستاندا بە ماڵکڕانی خۆی دەفرۆشێتەوە.
بەپێی ڕاپۆرتی پەیامنێری کوردستان‌و کورد دلاوەر ڕەنجبەرزادە، فەرماندەی سپای پاسداران لە مەهاباد بە هاوکاریی دەست‌و پێوەندییەکانی، باری تاناکۆڕاو مەشرووب‌و ئەو کاڵاو شمەکانەی لەلایەن ناوندەی نیزامی‌و ئەمنیەتییەکانی ئەو شارەوە لە کاسبکاران دەگیرێن، دەبرێنەوە سەردەشت‌و دەیانفرۆشنەوە.
بەپێی ئەو ڕاپۆرتە دەستبەسەرداگرتنی باری کاسبکاران‌و دوایەش بردنەوەی بۆ سەردەشت‌و فرۆشتنەوەی‌و لەبازاڕکردنەوەی بە هاوکاریی بەرپرسانی سپای پاسدارانی مەهابادو سەردەشت‌و بە شێوەی زۆر نهێنی دەکرێ.
لەلایەکی دیکەوە هەر ئەو فەرماندەیەی سپا بە وەرگرتنی پووڵ‌و بەرتیلێکی زۆر لە کاسبکاران‌و ئەو کەسانەی بە تۆمەتی هێنان‌و بردنی بەناو کاڵای قاچاغ دەگیرێن، لە ژێر ناوی نێوبژیوانی لە زیندان ئازادیان دەکا، بۆ ئەوەی دیسانەکەش لە کارەکەیان بەردەوام بن‌و ئەویش پوڵ‌و سامانی زیاتر لەو ڕێگەیەوە لەسەر یەک هەڵچنێ.
شایانی باسە مامەڵەی سپای پاسداران‌و کاربەدەستانی ڕێژیم لە کوردستان بە ماڵ‌و سامانی خەڵک لە حاڵێک دایە کە هەر لە ماوەی ئەمساڵدا زیاتر لە 26 کاسبکارو کۆڵبەری کورد بە تاوانی هێنان‌و بردنی کاڵای بەناو قاچاغ کە دوایە لەلایەن فەرماندەکانی سپاوە لە بازاڕ ورددەکرێنەوە، کوژراون‌و بریندار بوون.