سەدان کەس لە پزیشکان، پەرستاران و کارگێڕانی تەندروستی و دەرمانی هەروەها چالاکانی مەدەنی و سیاسیی نێوخۆ و دەرەوەی ئێران لە نامەیەکدا ڕوو لە بەرپرسی ڕێکخراوی تەندروستیی جیهانی داوایان کردوە کە هاوکاری خەڵکی ئێران بکەن بۆ پێشگیری لە ڤایرۆسی کۆڕۆنا.
لەم نامەیەدا بە ئاماژەدان بە کەمتەرخەمی حکوومەتی ئێران لە بەرابەر پێشگیری نەخۆشی کۆرۆنا و بەردەوامیی گەشتەکانی کۆمپانیای ماهان دوای بڵاوبوونەوەی ڤایرۆسەکە، شاردنەوەی هەواڵی بڵاوبوونەوەی کۆرۆنا لە ئێران بۆ بەڕێوەچوونی ڕێپێوانی ٢٢ی ڕێبەندان و هەڵبژاردنەکانی مەجلیس کە لە ٢ی ڕێبەندانەوە ئاگاداری بڵاوبوونەوەی ڤایرۆسەکە بوون, نووسیویانە شاری قوم یەکەم شار بوو کە تووشی ڤایرۆسەکە بوو، بەڵام کۆماری ئیسلامیی ئێران بە هەڵوێستێکی نابەرپرسانە و بۆ بەشداری کردنی خەڵک لە ڕێپێوانی ٢٢ی ڕێبەندان و هەڵبژاردنی مەجلیس ماوەی سێ حەوتوو ڕاستیەکانی لە خەڵک شاردەوە، هەروەها نووسەرانی ئەم نامەیە ڕەخنەیان لە قەرەنتینە نەکردنی شارەکانی ئێران لە لایەن کاربەدەستانەوە گرتوە و ئەوانیان بە هۆکاری زیاتر تەشەنەکردنی ڤایرۆسەکە تۆمەتبارکردوە.
لە درێژەی نامەکەدا هاتوە کە سەردانی شاندی نوێنەرایەتیی ڕێکخراوی تەندروستیی جیهانی لە چەند نەخۆشخانەیەکی لەپێشدا دیاریکراو لە لایەن حکوومەتەوە، تەنیا بۆ هەڵخەڵەتاندنی بیروڕای گشتی و چەواشەکاری بووە و، هیچ پێوەندییەکی بە ڕاستیی تاڵ و ترسناکی ئێستاوە نییە. ئەم بابەتە بووەتە هۆی ئەوەی خەڵکی ئێران بە سەرسووڕماوی و بێهیواییەوە سەیری ڕاپۆرتی ڕێکخراوی تەندروستیی جیهانی بکەن.
هەروەها لە بەشێکی تری نامەکەدا ئاماژەیان بە کەڵک وەرگرتنی دەسەڵات لە هاوکارییەکانی ڕێکخراوی تەندروستیی بۆ مەبەستەکانی خۆی کردوە و باسیان لەوە کردوە کە بەشێکی ئەم هاوکاریانە لە دەستی باندی مافیایی دەوڵەتدان و بە شێوەی دروست دابەش نەکراون و ڕەوانەی بازاڕی ڕەش کراون. هەر بۆیە دابەش کردنی هاوکاری و پێداویستییە تەندروستیەکان بێ چاودێری ڕێکخراوە تەندروستییەکانی نێوخۆ و ڕێکخراوی تەندروستیی جیهانی دابەشکردنێکی گونجاو نابێ.
لەو نامەیەدا باس لە ژمارەی تووشبوان بە ڤایرۆسی کۆرۆنا کراوە و گوتراوە کە ئەو زانیاری و ئامارانەی دەربارەی تووشبوان بڵاو دەکرێتەوە ڕاست نییە و ئامارەکان زۆر زیاتر لەوەن کە حکوومەتی ئێران بڵاوی دەکاتەوە.
لە کۆتایی نامەکەدا هاتووە کە بڵاوبوونەوە و تەشەنەسەندی ئەم نەخۆشیە لە ئێراندا، تەنیا زیانی بۆ خەڵکی ئێران نییە و دەکرێ ببێتە مەترسییەک لەسەر هەموو وڵاتانی جیهان و دەورووبەری، بۆیە داواکارین هەرچی خێراترە هاوکارییە تەندروستییەکان بگەیەننە ئێران و لە ژێر چاودێری خۆیان بەسەر ناوەندە تەندروستییەکاندا دابەشی بکەن.
