بەپێی ئەو هەواڵانەی کە تا ئێستا بڵاوکراونەتەوە، ڤایرۆسی کۆڕۆنا ١١٥ وڵاتی جیهانی گرتۆتەوە و هەزاران کەسی کردۆتە قوربانی.
ڤایرۆسی کۆڕۆنا کە لە مانگی نۆڤامبێردا لە وڵاتی چین ئاشکرا بوو، بەزوویی پەرەی سەند و زۆربەی وڵاتانی جیهانی گرتەوە.
لەگەڵ ئەوەی کە لە هێندێک وڵات ڕێوشوێنی توند گیرایەبەر، بەڵام کاربەدەستانی هێندێک وڵات زۆر خەمساردانە بەرەوڕووی ڤایرۆسەکە بوونەوە و بە هەندیان وەرنەگرت. کاربەدەستانی ڕێژیمی کۆماری ئیسلامی بۆ خاتری بەرژەوەندییەکانیان و پڕوپاگەندەی ٢٢ی ڕێبەندان و هەڵبژاردنەکانی مەجلیس، هەروەک هەمیشە یارییان بە گیان و ژیانی خەڵکی ئێران کرد و بەجێی پێشگرتن لە ڤایرۆسی کۆڕۆنا، نەخۆشییەکەیان شاردەوە. لەگەڵ ئەوەی کە بەشێک لە کاربەدەستانی دەوڵەت و کەسایەتییەکان خوازیاریی قەرەنتینەکردنی شاری قوم بوون کە سەرچاوەی ڤایرۆسەکە بوو، سپای پاسداران و ئاخوندە دەمارگرژە دواکەوتووەکان ئەو داواکارییەیان بە ناشایست لەقەڵەم دا کە لەئاکامدا زۆر زوو هەموو ئێرانی گرتەوە و ئێستاش لەبەرانبەریدا کڵۆڵ و دەستەوەستانن.
هەر بەپێی قسەکانی کاربەدەستانی ڕێژیم لە ئێران ڕۆژانە ٦هەزار تێستی کۆڕۆنا بۆ خەڵک ئەنجام دەدرێ، ئەوە لە حاڵێکدایە زۆر لە خەڵک سەردانی دوکتۆر و نەخۆشخانەکان ناکەن.
لەگەڵ ئەوەی کە تا ئێستا کاربەدەستانی ڕێژیم ئاماری قوربانییەکانیان ٥١٤ کەس و ئاماری تووشبوانیان نزیک بە ١١٥٠٠ کەس ڕاگەیاندووە، بەڵام بەپێی سەرچاوەکانی هەواڵ، ئاماری قوربانیان و تووشبووان زۆر لەوە زیاترە.
لەگەڵ ئەوەی کە دەوڵەتان بەهەموو هێزیانەوە بۆ قەرەنتینەکردنی شارەکان و پێشگیری لە بڵاوبوونەوەی ڤایرۆسەکە دەسبەکار بوون، بەڵام لە ڕۆژهەڵاتی کوردستان بەهۆی کەمتەرخەمی کاربەدەستانی دەوڵەت، ئەنجومەنەکان و ڕووناکبیران و خەمخۆرانی نیشتمان خۆبەخشانە هاتوونەتە مەیدان و بێ گوێدانە کەمتەرخەمییەکانی دەوڵەت، لەبیری پاراستنی خەڵکی کوردستاندان، ڕێگە سەرکەییەکان دەگرن، بەشێک لە هاتووچۆی نێوان شارەکانیان ڕاگرتووە و داوا لە خەڵک دەکەن کە لە ماڵەکانیان نەیەنە دەرەوە. هەروەها داوایان لە خەڵک کردووە کە دوکان و بازاڕەکان دابخەن و بەشێک لە پزیشکانی دڵسۆز و خۆبەخش بێ بەرانبەر لە ڕێگەی تەلەفۆنەوە ڕێنمایی دەدەنە خەڵک بۆ ئەوەی لە ماڵەکانیان نەیەنە دەرەوە و تەنیا لە کاتی پێویست و زەروریدا سەردانی نەخۆشخانەکان بکەن. ئەو هەوڵەی دڵسۆزانی کوردستان لەکاتێک دایە کە ڕێژیم بە زۆری هێز ڕێگە سەرەکییەکانی بازرگانیی دەپارێزێ و ناهێڵێ دابخرێن کە ئەوەش لەگەڵ ناڕەزایەتی خەڵک بەرەوڕوو بۆتەوە و مەترسی بڵاوبوونەوەی نەخۆشییەکەی زیاتر کردووە.
لەگەڵ ئەوەی کە بەشێک لەخەڵک بایەخی زۆریان بە خۆپاراستن نەداوە و مەترسیی ڤایرۆسەکەیان هەست پێ نەکردووە، بەڵام کەسانی خۆبەخش و شارەزا لە کوردستان بە هەموو توانایانەوە خەریکی ئاگادارکردنەوە و ڕیێنمایی خەڵکی کوردستانن و بەهێز و ئیمکاناتی خۆیان چالاکانە خەریکی پاراستنی خەڵک و نیشتمانن.
