ئەمریکا ڕایگەیاندووە لەسووریە بۆ شەڕ لەگەڵ داعش دەمێنێتەوە و هەموو جموجۆڵەکانی ڕووسیە و ڕێژیمی بەشار ئەسەد و هاوپەیمانەکانی لەژێر چاوەدێری دایە.
بەرپرسی کاروباری سووریە لە وەزارەتی دەرەوەی ئەمریکا ڕایگەیاند، ڕووسیە و حکومەتی سووریە لەگەڵ ئاگربەستی درێژخایەندا نین لە پارێزگای ئیدلب، چونکە بەدوای ئەوەوەن لە ڕێگەی سەربازییەوە سەرکەوتن وەدەستبهێنن.
جیمس جێفری، بەرپرسی کاروباری سووریە لە وەزارەتی دەرەوەی ئەمریکا لە پانێلێکدا لە برۆکسل لەبارەی ئاگربەستی ئیدلب کە بەم دواییە لەنێوان ڕووسیە و تورکیە کراوە، ڕایگەیاند، ئەوان لەو باوەڕەدا نین ڕووسیە و حکومەتی سووریە لەگەڵ ئاگربەستی هەمیشەییدا بن لە ئیدلب.
جێفری ئاماژەی بەوە کرد، ڕووسیە و حکومەتی سووریە چاویان لەوەیە لە ڕێگەی سەربازییەوە لە سووریە سەرکەون، بەڵام ئەمریکا دەیەوێت ڕێگە لەو ئامانجەی ئەوان بگرێت و هەوڵ دەدات کێشەکان لە ڕێگەی دیپلۆماسی و ئاشتییەوە چارەسەربکرێن.
لە بارەی مانەوەی هێزەکانی ئەمریکاش لە سووریە، جێفری ئاماژەی بەوەدا، ئەوان بۆ شەڕی داعش لەوێن و لەگەڵ هاوپەیمانیی نێودەوڵەتی دژی داعش ئەو ئەرکە ڕادەپەڕێنن وهەموو بژاردەیەکیشیان بۆ پشتیوانیی تورکیە لە سووریە لە بەردەستدایە.
لە لایەکی دیکەوە سەرۆک کۆماری فەرانسە “ئیمانۆئێل مەکرۆن” داوای ئاگربەستی هەمیشەیی لە سووریە دەکا و دەڵێ کێشەی سووریە کە ئەوە ٩ ساڵە بەرۆکی ئەو وڵاتەو کۆمەڵگەی جیهانی گرتووە بە شەڕ و دەستێوەردانی وڵاتانی ناوچە چارەسەر ناکرێ و دەبێ ڕێگەی چارەی سیاسی و هەمەلایەنەی بۆ بدۆزرێتەوە.