کۆچی دوایی دڵسۆزێکی دیموکرات لە ناوچەی ورمێ

سەعدی ئیبراهیمی ناسراو بە سۆفی سەعدی کوڕی حاجی میرزا، لە تەمەنی ٦٠ ساڵی دا کۆچی دوایی کرد.
ڕۆژی ٢٣ی خەرمانان، لە ئاوایی “نەڕەڵە”ی ناوچەی باراندوزی ورمێ، سەعدی ئیبراهیمی دڵسۆزێکی لە مێژینەی حیزبی دیموکرات‌و بزووتنەوەی کوردستان کۆچی دوایی کرد.
سۆفی سەعدی هەر لە دوای دەستپێکردنەوەی تێکۆشانی ئاشکرای حیزبی دیموکرات‌و کرانەوەی بنکەو بارەگاکانی پێشمەرگە لە گەلیی قاسملوو و ناوچەکانی دیکەی ورمێ، بوو بە پشتیوان و دڵسۆزی ڕۆڵەکانی دیموکرات. ئەو نەک هەر خۆی لە هاوکاریی پێشمەرگەکانی دیموکرات درێغی نەدەکرد بەڵکوو دۆستان‌و ناسیاوان‌و نزیکانی خۆشی هان دەدا بۆ ڕزگاریی نەتەوەکەیان لە بندەستی‌و ڕۆژرەشی پشتیوان‌و هاوکاری بزووتنەوەی کوردستان‌و هێزی پێشمەرگە بن.
لە قۆناغەکانی دواتری بزووتنەوەی سۆڕشگێڕانەی کوردستان دا، سەعدی ئیبراهیمی لە هەر شوێنێک کادرەکان و پێشمەرگەکانی حیزب پێویستیان بە هاوکاریی ئەو بوایە و پێوەندییان پیوە گرتبا، بە گیان و دڵ بە دەنگیانەوە دەچوو.
کۆمیسیۆنی تەشکیلاتی حیزبی دیموکراتی کوردستان بە بۆنەی کۆچی دوایی سۆفی سەعدی، لە قووڵایی دڵەوە سەرەخۆشی لە ماڵباتی ئیبراهیمی و خەڵکی نەڕەڵە و هەموو ناوچەی باڵانیش دەکا.