شەوی ١٩ی لەسەر ٢٠ی ڕەشەمە برای بەڕێز مامۆستا عەبدووڵڵا حەسەنزادە، خدر حەسەنزادە لە نەخۆشخانەی شاری مەهاباد لە تەمەن ٩٢ ساڵیدا و بەهۆی نەخۆشییەکی درێژخایەن ماڵاوایی لە ژیان کرد. بەڕێز خدری حەسەنزادە مرۆڤێکی نیشتمانپەروەر و خەڵکخۆشەویست و جێی متمانەی خەڵکی ناوچەی سەردەشت و ڕەبەت بوو. ناوبراو بە هۆی تێکۆشان و خەباتی سیاسی و حیزبایەتی براکەی، واتە مامۆستا عەبدووڵڵا، چ لەسەردەمی ڕێژیمی پاشایەتی و چ لە دوای هاتنەسەرکاری کۆماری ئیسلامیی ئێران لەژێر چاوەدێری هێزە ئیتلاعاتییەکان دابووە و چەند جارێک لێپێچینەوەی لێکراوە.
لە ناوەندی ڕاگەیاندنی حیزبی دێمۆکراتی کوردستانەوە سەرەخۆشی خۆمان ئاراستەی بەرێز عەبدووڵڵا حەسەنزادە، کەسایەتی ناوداری کورد و جێگر سکرتێری شەهیدی ڕێبەر، قاسملووی نەمر و سکرتێری پێشووتری حیزبەکەمان دەکەین و خۆمان بە شەریکی خەمی لەدەستدانی برابەڕێزەکەی دەزانین.
بەو بۆنەیەوە بەڕێز مامۆستا عەبدووڵڵا حەسەنزادە پەیامێکی بڵاو کردووەتەوە کە ئەمەش دەقەکەیەتی:
بۆ ئاگاداریی ئازیزان و هەموو دۆستان!
بەداخێکی گرانەوە ئاگادار بووم کە سەعات ٩ و نیوی ئەمشەو ١٩ لەسەر ٢٠ی ڕەشەمەی ١٣٩٨ تاقە برا گەورەم کە لە ژیاندا مابوو، بە ناوی خدر حەسەن زادە بە هۆی نەخۆشییەکی درێژخایەن لە شاری مەهاباد کۆچی دوایی کردوە. وەک لە کوردەواریدا دەڵێن دایک و باب لە ئینسانی پیر نابن، براش لەو ئازیزانەیە کە هەروەخت لە دەست بچن داخێکی گران لەسەر ڕووحی مرۆڤ دادەنێن. بەتایبەتی براکانی من کە هەموویان لە خۆم گەورەتر بوون هەقی زۆریان بەسەر منەوە هەبووە و لە منداڵیمەوە پشتوپەنام بوون و هەرچیم هەیە لەوانی دەناسم.
ئەوەی هەمیشە بۆ مەمانان تاڵ و جێگای کەسەر بووە، ئەوەیە کە لەو موسیبەتانەدا دەرفەتی ئەوەندەمان نەبووە لە دوا ساتەکانی ژیانی ئازیزانماندا لە پەنایان بین و دوا ماڵئاواییان لێ بخوازین. سەرباری ئەوەش کۆستی تازەی من لە هەلومەرجێکدایە کە لە کوردستان و تەواوی وڵاتانی دەوروبەر و تەنانەت هەموو دنیادا بەڵایەکی جیهانگیر لە ئارادایە کە دەرەتانی دانانی پرسە و وەرگرتنی سۆز و هاودەردیی دۆست و ئاشنایانیشی بۆ کۆستکەوتووان نەهێشتۆتەوە.
هەر بۆیە دەگەڵ ڕاگەیاندنی ئەو هەواڵە ناخۆشە و داوای شادیی ڕووحی برا گەورەی لەدەستچووم و ئاواتی سڵامەتی و تەمەندرێژی بۆ ئەندامانی بنەماڵەکەی، هەموو لایەک ئاگادار دەکەم کە بە هۆی ئەو بارودۆخە نالەبارەوە نیازم نیە مەجلیسی سەرەخۆشی دانێم و داوا لە سەروەران دەکەم لوتف و گەورەیی و هاودەردیی خۆیان بە ڕێگای تەلەفون و ئامرازەکانی دیکەی پێوەندیدا بە من و هەموو کەسوکاری خوالێخۆشبوو ڕابگەیەنن و زەحمەتی سەردان و سەرەخۆشیی حوزووری بە خۆیان نەدەن.
هیوادارم هەموو دۆستان و ئازیزانم لە بەڵا و موسیبەت بەدوور بن و لە خوای گەورە داوا دەکەم ئەو بەڵا گەورەیەش کە دنیای بەخۆیەوە خەریک کردوە، بە زوویی لە کۆڵ مرۆڤایەتی بکاتەوە.
دەگەڵ حورمەتی زۆر بۆ هەمووان.
عبداللە حسنزادە
١٩\١٢\١٣٩٨- ٩\٣\ ٢٠٢٠
