ڕاپۆرت، ئامار و هەواڵەکان باس لەوە دەکەن کە دەیان کەس لە نیگابان و بەندکراوانی زیندانەکانی ئێران تووشی ڤایرۆسی کۆرۆنا بوون.
لەگەڵ ئەوەیکە ڕاپۆرت و هەواڵی تووشبوونی دەیان کەس لە بەندییەکانی زیندانەکانی ئێران بڵاو بووەتەوە، کۆماری ئیسلامی هیچ هەواڵێکی لەوبارەوە بڵاو نەکردووەتەوە و مەرەخەسیی کاتی بە زۆربەی زیندانییەکان نەداوە. هەروەها کەرەستە و دەرمانی پێویست بۆ بەرگری لە ڤایرۆسی کۆرۆنا لە بەندیخانەکانی ڕێژیمدا نییە.
سەرچاوەکانی هەواڵ باس لەوە دەکەن کە چەندین بنەماڵەی زیندانی پێوەندیان بە بەندکراوانەوە کردووە و بۆیان دەرکەوتوە کە تووشی ڤایرۆسی کۆرۆنا بوونە. دەگوترێ کە ٣٠ کەس لە بەندیخانەکانی تاران و هەندێ کەسیش لە بەندیخانەی ورمێدا تووشی ڤایرۆسی کۆرۆنا بوونە. سەرەڕای ئەوەش، سەربازێک لە بەندیخانەی ئەوین تووشی ڤایرۆسی کۆرۆنا بووە. هەروەها ژمارەیەک لە زیندانیانی “ترەنسجێندێر” لە بەندی ٢٤٠ی ئەوین، تووشی ڤایرۆسی کۆرۆنا بوونە و هەر بەو بۆنەوە بۆ خوارەوەی بەندی ژمارە یەک گوازراونەتەوە.
لە لایەکی دیکەوە، ژمارەیەک لە چالاکانی سیاسی و مەدەنی و هەروەها زیندانیانی پێشوو سیاسی، دەڵێن کە ژمارەیەکی زیاتر لە بەندکراوان تووشی کۆرۆنا بوونە. سەعید مەلەک پوور، زیندانیی پێشووی سیاسی، لە لاپەڕەی تویتێریی خۆیدا ڕایگەیاندووە کە شەش کەس لە بەندکراوانی بەندیخانەی ئەوین تووشی ڤایرۆسی کۆڕۆنا بوون.
لە شاری ورمێ، بنەماڵەی چەند زیندانییەکی سیاسی لە پێش گرتووخانەکاندا کۆ بوونەوە و داوایان کرد کە ڕۆڵەکانیان ئازاد بکرێن یان مەرەخەسییان پێ بدرێ.
جێگای ئاماژەیە کە لەم ڕۆژانەی ڕابردوودا ژمارەیەکی بەرچاوی خەڵک تووشی ڤایرۆسی کۆرۆنا بوونە و ئێستا ئەو ڤایرۆسە بووەتە مەترسییەکی جیددی بۆ سەر زیندانیان و بەندکراوان لە بەندیخانەکانی ڕێژیمی کۆماری ئیسلامیی ئێراندا و کاربەدەستانی دەوڵەت بایەخ بە گیان و سڵامەتی زیندانییەکان نادەن.
