حیزبوڵڵای عێراق هەڕەشە لە دەوڵەتی عێراق دەکا لەسەر ئەگەری سەرۆكی دەزگای ھەواڵگری ئەو وڵاتە بۆ پۆستی سەرۆک وەزیرانی عێراق.
لە بەیاننامەیەكدا میلیشیاكانی حیزبوڵڵای عێراق بڵاویان كردۆتەوە، مستەفا كازمی، سەرۆكی دەزگای ھەواڵگری عێراق ھاوكاری ئەمریكاییەكانی كردووە لە كوشتنی” قاسم سلێمانی و ئەبوو مەھدی موھەندیس”دا هەربۆیە ناوبراویان وەکوو دوژمنی خۆیان و ئیسلام و عێراق ناوبردووە.
ئاماژە بەوەش دەكەن کە باشترین بژاردە بۆ سەرۆک وەزیرانی عێراق ئەوەیە کە خەڵکی عێراق و لایەنە سیاسییەکان دەستبەرداری عادل عەبدولمەھدی نەبن و كار بكرێت بۆ ئەوەی جارێكی دیكە بگەڕێندرێتەوە سەر پۆستەكەی و كابینەیەكی نوێ پێکبێنێ.
جێگای ئاماژەیە کە لە چەند ڕۆژی ڕابردوودا دەنگۆی كاندیدكردنی مستەفا كازمی لە میدیاكانی عێراق بۆ پۆستی سەرۆک وەزیران بڵاوكرایەوە.