جاشەکانی ڕیژیم لە ناوچەی سەردەشت بە جلوبەرگ وناوی پێشمەرگەی دیموکراتەوە، خەریکی پیلانگێرین.
کۆمیسیۆنی تهشکیلاتی حیزبی دێموکڕاتی کوردستان دهڵێ بوونی یەک بە دوای یەکی تیمەکانی پێشمەرگەی حیزبی دیموکراتی کوردستان لە ناوچەکانی سەردەشتو ڕەبەت، ئەگەر لە لایەکەوە بووە بە هۆی ئەو پەڕی خۆشحاڵیو هیواداریی خەڵک، لە لایەکی دیکهوه بووە بە هۆی وەحشەتو نیگەرانیی هێزە چەکدارەکانو بەکرێگیراوانی دامودەزگای جاسوسیو ئەمنییەتیی ڕێژیم لەو ناوچانە. جاشەکانو بەکرێگیراوانی سوپاو ئیتلاعات، بۆ زەبر وەشاندن لە پێوەندیی گەرمو پتەوی خەڵکو ڕۆڵە پێشمەرگەکانیان، کەوتوونە پیلانگێڕێ.
بە گوێرەی ئەو هەواڵانەی بە کۆمیسیۆنی تەشکیلاتی حیزبی دێموکڕاتی کوردستان گەیشتوون، ماوەیەکە جاشەکان لە هەر دوو ناوچەی سەردەشت و رەبەت، دەچنە گوندەکانو بە لەبەرکردنی جلوبەرگی پێشمەرگەی دیموکراتو هەڵگرتنو نیشاندانی وێنەی ڕێبەرانی شەهید، هەوڵ دەدەن خەڵک بە فریو بەرنو بەم جۆرە هەم پێو شوێنی تیمەکانی پێشمەرگە هەڵ بگرن، هەم ئەو خەڵکە شناسایی بکەن کە پشتیوانو هاوکاری هێزی پێشمەرگەن.
هەر لەو پێوەندییە دا ستادی پارێزەرانی ڕۆژهەڵات لە ناوچەکانی سەردەشتو رەبەت، لە ڕاگەیەندراوێکدا کە نوسخەیەکی بە ناوەندی هەواڵی کوردستانوکورد گەیشتوە، ئولتیماتۆمیان بەو جاشو بەکرێگیراوانە داوەو ڕایان گەیاندوە کە ئەگەر دەست لە پیلانگێڕیو شوێن پێ هەڵگرتنی هێزی پێشمەرگە هەڵنەگرن، هەر بەو چەشنەی لە یەکساڵی رابردوودا تاقییان کردوەتەوە، بەرەوڕووی زەبری پارێزەرانی ڕۆژهەڵاتی کوردستان دەبنەوە.
ههر لە پێوەندی لە گەڵ ئەو پیلانگێڕییەی جاشەکانی ڕێژیم دا، کۆمیسیۆنی تەشکیلات داوا لە خەڵکی پێشمەرگەپەروەری ناوچەکانی سەردەشتو ڕەبەت دەکا، تا بە وشیارییەوە بەرەورووی ئەو کەسانە ببنەوە کە بە ناوی پێشمەرگەی دیموکرات دێنە نیو گوندەکانو سەر مووچە و مەزرایان و، هەتا لە ناسینیان دڵنیا نەبن، هیچ هاوکارییەکیان نەکەن.
