ڕۆژی پێنجشەممە، ١٧ی ڕێبەندان، کانوونی سێنفیی مامۆستایانی کوردستان/ سەقز و زیویە، لە بەیاننامەیەکدا، پشتیوانیی خۆیان لە چالاکانی سێنفی- فەرهەنگیی خوراسانی باکوور دەربڕی.
کانوونی سێنفیی مامۆستایانی کوردستان/ سەقز و زیویە، داسەپاندنی حوکمیان دژی ٧ چالاکی فەرهەنگیی کورد لە خوراسانی باکوور مەحکووم کرد و ڕایانگەیاند کە ئەو حوکمە ناڕەوایە قبووڵ ناکەن.
ئەو مامۆستایانە لە بەیاننامەیەکدا پێداگرییان لەسەر ئەوە کردەوە کە چالاکیی سێنفی تاوان نییە و خوازیاری داخستنی دەسبەجێی دۆسیە ساختە و دەسکردەکان دژی ٧ چالاکی سێنفییی کوردی خەڵکی خۆراسانی باکووربوون.
ڕۆژی ٩ی ڕێبەندانی ٩٨ی هەتاوی، شورای هاوئاهەنگی بۆ پێکهێنانی ڕێکخراوە سێنفی- فەرهەنگییەکانی ئێران لە بەیاننامەیەکدا باسی لە داسەپاندنی حوکمی ٤١ ساڵ زیندانی لە دۆسیەیەکدا بۆ ٧ چالاکی فەرهەنگیی کورد لە خوراسانی باکوور کرد.
ئەو حوکمە داسەپاوە دژی ئەو ٧ چالاکە فەرهەنگییە لە دادگای گشتی، لە قۆناغی پێداچوونەوەدا پشتڕاست کرایەوە.
