ئەنجوومەنی نوێنەرانی ئەمریکا بڕیارنامەیەکی لە پێوەندی لەگەڵ مەحکووم کردنی سەرکوتی خەڵک لە لایەن کۆماری ئیسلامییەوە و پشتیوانی لە خەڵکی ئێران پەسەند کرد.
ئەنجوومەنی نوێنەرانی ئەمریکا بڕیارنامەیەکی پەسەند کرد کە وێڕای پشتیوانی لە مافی ئازادی هاونیشتمانیانی ئێرانی لە دەربڕینی بیروڕا، کۆماری ئیسلامیشی لە پێوەندی لەگەڵ سەرکوتی خۆپێشاندەران و گوشاری سەر خەڵک، مەحکووم کرد. ئەو بڕیارنامەیە بەدەنگی تەواوی ئەنجوومەنەکە پەسەند کرا و هیچ کەس دژایەتی نەکرد.
لە بڕیارنامەکەدا ئاماژە بەوە کراوە کە خۆپێشاندانەکانی پاییزی ڕابردوو گرینگترین خۆپێشاندانن دوای خۆپێشاندانەکانی جووڵانەوەی سەوز لە ساڵی ١٣٨٨ی هەتاویدا.
لە بەشێکی بڕیارنامەکەدا هاتوە، “لە کاتی خۆپێشاندانەکانی مانگی خەزڵوەردا کە بەهۆی گرانی بەنزینەوە دەستی پێکرد، نەک تەنیا ئینتەرنێت لە سەرانسەری وڵات پچڕا بەڵکوو ڕاپۆرتێکی زۆر لە سەر سەرکوت و تەقەی ڕاستەوخۆی هێزە چەکدراەکان لە خەڵک بڵاوکرانەوە.
کۆماری ئیسلامی تا ئێستا ژمارەی قوربانیانی ڕانەگەیاندووە بەڵام بەپێی ڕاپۆرتێکی هەواڵدەریی ڕۆیتێرز ١٥٠٠ کەس لە خۆپێشاندەران کوژراون”.
هەر لە درێژەدا باس لەوە کراوە کە کۆماری ئیسلامی خەڵکێکی زۆری کوشتوە، هەزاران کەس بە تەقەی هێزەکانی کۆماری ئیسلامی بریندار بوون و هەزاران کەسیش خراونەتە زیندان. لە بەشێکی دیکەدا هاتوە کە کۆماری ئیسلامی بەشێک لە گیراوەکانی کوشتوە بەڵام نەک هەر تەرمەکانیان ڕادەستی بنەماڵەکانیان ناکاتەوە، بەڵکوو ئیزن نادا کەس و کاری قوربانییەکان بچنە سەر مەزاری ڕۆڵە لەدەسچوەکانیان.
لە درێژەی بڕیارنامەکەدا ئاماژە بە قسەکانی خامنەیی و چەند کەس لە کاربەدەستانی ڕیژیم کراوە کە گوتوویانە ئیدی لەگەڵ کەس سازش ناکەن و بەتوندی لەگەڵ ناڕازیان هەڵسوکەوت دەکەن و پێش لە هێزە چەکدارەکانیان ناگرن.
لە بڕیارنامەکەدا ئاماژە بەوە کراوە کە سەرەڕای ئەوەی کۆماری ئیسلامی پەیماننامە نێودەوڵەتییەکانی ئیمزا کردووە، بەڵام لە دەیان ساڵی ڕابردوودا وێڕای پێشێلکردنی مافەکانی مرۆڤ، بەتوندترین شێوە لەگەڵ ناڕازیان هەڵسوکەوتی کردوە.
چەند خاڵێکی بڕیارنامەکە بریتین لە:
نوێنەرانی مەجلیس لەگەڵ خەڵکی ئێرانن و پشتیوانی لە خۆپێشاندانی مەشرووعی ئەوان دژی زوڵم و ستەم وگەندەڵی دەکەن.
ئەنجوومەنی نوێنەران پێشێلکردنی مافەکانی مرۆڤ لە لایەن حکوومەتی گەندەڵ و ئاژاوەگێڕییەکانی کۆماری ئیسلامی لە جیهاندا مەحکووم دەکا.
ئەنجوومەنی نوێنەران داوا لە هەموو دەوڵەتان و کۆڕ و کۆمەڵە بەشەردۆستەکان دەکا کە بە ڕوونی پشتیوانی لە مافە ڕەواکانی خەڵکی ئێران بکەن و داوا بکەن کە کۆماری ئیسلامی پێبەندی یاسا و ڕێسا نێودەوڵەتییەکان بێ.
ئەنجوومەنی نوێنەران داوای لە دەوڵەتی ئەمریکا کردووە کە هەوڵ بدا تا ئەنجوومەنی ئاسایشی نەتەوە یەکگرتوەکان کۆبوونەوەیەک بۆ مەحکوومکردنی کۆماری ئیسلامی و ڕێکارێک بۆ چاوەدێریکردنی هەڵسوکەوت و سەرکوتی خەڵک لەلایەن کۆماری ئیسلامییەوە بگرێتەبەر.
ئەنجوومەنی نوێنەران داوا دەکا کە کۆمپانیاکان بۆ بڕینی خەتی تەلەفۆن و ئینتەرنێت داواکاری کۆماری ئیسلامی ڕەت بکەنەوە.
بڕیارنامەکە پشتیوانی لە مافی خۆپێشاندان و دەربڕینی بیروڕا و هەڵبژاردنی ئازاد و سیستمێکی سیاسی دێموکڕات دەکا.
هەروەها یاسادانەران داوا لە سەرۆک کۆمار و وەزیری دەرەوەی ئەمریکا دەکەن کە بە هاوکاری کۆمەڵگەی نێودەوڵەتی، پێشێلکردنی مافی مرۆڤ لە ئێران بکەنە بەشێک لە کۆبوونەوە ڕەسمی و غەیرە ڕەسمییە دوولایەنە و چەند لایەنەکانیان لەگەڵ کاربەدەستانی کۆماری ئیسلامیی ئێران.