ڕێگری لە فرۆشرانی كتێبێكی كوردیی نووسه‌رێکی کوردی خۆراسان لە ورمێ

لە شاری ورمێ ڕێگری لە بڵاوبوونەوە و فرۆشرانی كتێبی “باغچەی سەروها” كرا.
بەپێی ڕاپۆرتی ماف نیووز، پاش ئەوەی كە نەقدعەلی عەلەوی فەرد، نووسەری كتێبی كوردی‌و فارسیی “باغچەی سەروها”و بڵاوكراوەكانی پێوەندیدار بە خۆراسانی باكوور بەدوای فرۆشتن‌و بڵاوکردنه‌وه‌ی ئەم كتێبە لە ورمێ بوو، ئیدارەی فەرهەنگ‌و ئیرشادی ئیسلامیی ورمێ، هەڕەشەی لە كتێب فرۆشییەكانی ئەم شارە كردووە كە بە هیچ شێوەیەك بۆیان نییە ئەم كتێبە بفرۆشن.
ئیدارەی فەرهەنگ و ئیرشادی ئیسلامی هەڕەشەی ئه‌وه‌ی لە بڵاوكەرەوەكانی كتێب لە ورمێ كردووە كە لە ئەگەری فرۆشتنی بێ مۆڵەتی ئەم كتێبە لە ئاستی شاری ورمێدا، مۆڵەتی بڵاو كردنەوەو فرۆشتنی كتێبیان لێ دەستێندرێتەوە.
ئەم كتێبە ٣٣٠ لاپەڕەییە كە ناوە كوردییەكەی “باخچەیا مەرەخان”ە، لەبارەی گوندی مێژوویی “باغچق” لە دەوروبەری شاری بۆجنوورد لە پارێزگای خۆراسانی باكوور نووسراوه‌و لە لایەن بڵاوكەرەوەی “عەموو عەلەوی”یەوە بۆ بازاڕی كتێب نێردراوە.
لەم كتێبەدا، باس لە پێشینەی مێژوویی كوردەكانی خۆراسان، حەشیمەت، زمان، ئایین‌و داب‌و نه‌ریت‌و پێكهاتەی نەتەوەیی ئەوان كراوە.
شایانی باسه‌ که‌ كوردەكانی خۆراسان لە نزیكەی ٥٠٠ ساڵ لەمەوبەرەوە لە 3 قۆناغی مێژویی‌دا، لە شارەكانی باكووری پارێزگای ورمێ ڕا ناچار بە كۆچی زۆره‌ملێ بۆ ئەم ناوچانە كراون‌و لە حكوومەتە جۆراجۆرەكاندا، ڕێگری لە پێوەندی گرتنیان بە كوردەكانی ورمێ كراوە.