نیگەرانیی بەرپرسان‌و مامۆستایانی زانكۆ له‌ ئیلام لە ئاماری بەرزی خۆكووژی لەم پارێزگایە

بەرپرسانی ناوچەیی‌و مامۆستایانی زانكۆ لە پارێزگای ئیلام، لە كۆبوونەوەیەكدا كە بە مەبەستی تاوتوێكردنی خەسارە كۆمەڵایەتییەكان لەم پارێزگایە پێك هاتبوو، نیگه‌رانیی خۆیان له‌ ئاماری به‌رزی خۆكوژی لە پارێزگای ئیلام ڕاگه‌یاند.
عەلی مووسانژاد، ئەندامی هەیئەتی زانستیی زانكۆی ئازادی ئیلام ڕایگەیاند، هەرچەند ئاماری خۆكوژی لە ئیلام لە ساڵی ١٣٩٢ڕا تا ئێستا لە چاو پێشتر بڕێک لە كەمی داوە، بەڵام ئێستاش ئاماری بەرزی خۆكوژیی لەم پارێزگایە جێگەی نیگەرانییە.
جەعفەر داراب خانی، جێگری كۆمەڵایەتی‌و پێشگیری لە ڕوودانی تاوانی دادگوستەریی ئیلامیش ڕایگەیاندووە ڕیشەی سەرەكیی تاوانەكان لەم پارێزگایە بۆ تەڵاق‌و خۆكووژی‌و توندوتیژی دەگەڕێتەوە.
لەم كۆبوونەوەیەدا ئامارێكی وردو دەقیق لە بابەت ڕێژەی ئەم كەسانەی لەو پارێزگایە خۆیان دەكوژن ڕانەگەیەندرا، جیا له‌وه‌ هه‌ر به‌ گشتی كاربەدەستانی ئێران بە زحمەت‌و زۆر بە دەگمەن ئاماری خەسارە كۆمەڵایەتییەكان بڵاو دەكەنەوە.
پارێزگای ئیلام ٥٨٥ هەزار كەسی حەشیمەت هەیە‌و بەپێی ئامارەكانی وەزارەتی خۆشبژێوی، ئەم پارێزگایە له‌ پلەی یەكەمی ژێر هێڵی هەژاری‌دا جێێ گرتوه‌. پارێزگای ئیلام هەروەها لە بواری ڕێژەی بێكاریش‌دا لە سه‌رووی هه‌موو پارێزگاو ناوچه‌کانی دیکه‌ی ئێرانه‌و هەروەها تەنیا لە ساڵی ١٣٨٩دا دوو هەزار كەس لەم پارێزگایە خۆیان كوشتووە‌و كۆتاییان بە ژیانیان هێناوە.
زۆربەی ئەم كەسانەی كە لەو پارێزگایە خۆیان دەكوژن لە ژنان پێك هاتوون، هەروەها تەمەنی خۆكووژی لە پارێزگای ئیلام ژێر 30 ساڵ ڕاگەیەندراوە.
ئاماری پزیشكی قانوونیی ئێران دەریخستووە كە لە نێوان ساڵەكانی ١٣٨٠ تا ١٣٩١، زیاتر لە ٣٠ هەزار كەس لەم ئێران له‌ رێگای خۆکوژییه‌وه‌ كۆتاییان بە ژیانی خۆیان هێناوە.