ڕۆژی شەممە ١٤ی دێسامبری ٢٠١٩زایینی٫ کاتژمێر یەکی دوانیوەڕۆ لەلایەن کۆمیتەی دانمارکی حیزبی دێموکراتی کوردستان سیمینارێک بەبۆنەی ٢٦ی سەرماوەز ڕۆژی پێشمەرگە و ڕۆژی ئاڵای کوردستان لە ژێر ناونیشانی ” پێویستییەکانی خەباتێکی کاراتر لە ڕۆژھەڵاتی کوردستان “، پێکھات .
بەرنامەکان بە سرودی نەتەوایەتی ئەی ڕەقیب دەستی پێکرد .
پاشان بۆ ڕێزگرتن لە گیانی پاکی شەھیدانی کوردستان خولەکێک بێدەنگی ڕاگەیەنرا.
لە دەستپێکی سیمینارەکە دا ئەحمەد ڕەحمانی لەلایەن کۆمیتەی حیزبەوە بەخێرھاتنی میوانەکان و نوێنەرانی ھێز و لایەنە سیاسیەکان و ئەندامان و لایەنگرانی حیزبی دێموکراتی کوردستانی کرد.
دواتر کاک قادر وریا تێکۆشەری دێرینی حیزبی دێموکراتی کوردستان باسەکەی خۆی لەژێر ناوونیشانی” پێویستییەکانی خەباتێکی کاراتر لە ڕۆژھەڵاتی کوردستان ” پێشکەش کرد .
دەسپێکی باسەکەی بەڕێز وریا ئاوڕدانەوەیەک بوو لە هەڵکرانی ئاڵای کوردستان بۆ یەکەم جار لەشاری مەهاباد لە۲٦ی سەرماوەزی ۱۳۲٤دا. کۆڕگێڕ هەروەها ئاماژەی بە چۆنیەتیی ناودێرکرانی ئەو ڕۆژە بە ” ڕۆژی پێشمەرگەی کوردستان” لە لایەن حیزبی دێموکراتەوە کرد. ڕۆڵ و گرنگیی هەر دوو هێمای “پێشمەرگە” و ئاڵای لە بزووتنەوەی رزگاریخوازانەی نەتەوەی کورد دا بەرز نرخاند.
تەوەری دووھەمی باسەکەی کاک قادر وریا باسێکی پڕ نێوەرۆک بوو لە سەر پێویستیەکانی ئێستای بزووتنەوەی کورد لە ڕۆژهەڵاتی کوردستان بە لە بەرچاوگرتنی هەلومەرجی نێوخۆیی و دەرەکیی کۆماری ئیسلامیی ئێران. بەڕێزیان وێڕای قامک دانان لە سەر لایەنە پڕشنگدار و بە هێزەکانی بزووتنەوەی نەتەوەیی و ئازادیخوازیی ڕۆژهەڵاتی کوردستان، بە دیدێکی ڕەخنەگرانەوە باسی لە لاوازیی و دیاردەکانی جێی ڕەخنە لەو بزووتنەوەیە دا کرد. کۆڕگێڕ لە درێژەی باسەکەی دا ئاماژەی بە کۆمەڵێک ناکارایی ئەو بزووتنەوەیە لە بوار و مەیدانی جۆراوجۆردا کرد کە بەرهەمی مملانێی ناڕەوا و وێکهەڵنەکردن و نەبوونی هاوکاریی جیددی لە نێوان رێکخراوە سیاسییەکاندان. بەڕێز قادر وریا لە کۆتایی باسەکەی دا چەند ڕێکارێکی بۆ کاراتربوونی خەباتی نەتەوەیی و ئازادیخوازی لە رۆژهەڵاتی کوردستان پێشنیار کرد. پێویستیی ئاوڕدانەوەی رەخنەگرانەی حیزبەکان لە هەڵە و کەمتەرخەمی و کێشەکانی ڕابردووی خۆیان و دان پێدانانیان، زەروورەتی دەرس وەرگرتن لە ڕابردوو و چاوخشاندنەوەی جیددیی حیزبەکان بە پێوەندیی نێو ڕێکخراوەیی و پێوەندییە زیانبارەکانیان لە گەڵ یەکتر بەشێکی دیکەی باسەکەی کاک قادر وریا بوو.
گرنگیی گواستنەوەی تەبایی و هاوکاریی سنوورداری ئێستای نێوان ژمارەیەک لە حیزبەکان بۆ ئاستێکی بەرزتر و گشتگیر کردن و بەرینکردنەوەی هاوخەباتی و هاوپەیمانی سیاسی، ئەنجامدانی تێکۆشانی پلانمەندی کاری دیپڵۆماسی٫ کاری پێشمەرگانە، کاری ڕاگەیاندن و هەروەها کاری هاوبەش و پسپۆرانە لە ئاستی نێودەوڵەتی لە سەر کەیسەکانی تیرۆر، کۆمەڵکوژی و پێشێلکرانی مافی مرۆڤ لە ڕۆژهەڵاتی کوردستان کۆمەڵێک لەو رێکارانە بوون کە کۆڕگێر خستنیە ڕوو.
دوای پشوودانێک بەشی دووهەمی سیمینارەکە بەڕێوە چوو. دەسپێکی ئەو بەشە٫ ھۆنراوە و غەزەلێکی پڕ لە ھەست و سۆز بوو بۆ پێشمەرگە و ئاڵای کوردستان و ھەروەھا شەھیدانی شەوی یەڵدای خوێناوی کە لە لایەن شاعیری لاو کاک حوسێن مەحموودی پێشکەش کرا.
بەشی کۆتایی سمینارەکە پرسیار و تێبینی و سەرنجەکانی بەشدارانی سیمینارەکە بوو لە پێوەندی لەگەڵ باسەکانی کاک قادر وریادا ، کە بەڕێزیان وڵام و ڕوونکردنەوەی پێویستی لە بارەیانەوە پێشکەش کرد.
