پەیامی یەکیەتیی نەتەوەیی دێموکراتی کوردستان، مەکتەبی سیاسی
بەبۆنەی ٧٠ سالەی دامەزراندنی حیزبی دێموکراتی کوردستان
بۆ بەڕێز دەفتەری سیاسی حیزبی دێموکراتی کوردستان!
سڵاوی سەربەخۆیی و ئازادی!
بەبۆنەی یادی ٧٠ ساڵەی دامەزراندنی حیزبەکەتان ” حیزبی دێموکراتی کوردستان” بەناوی خۆمان و تەواوی ئەندام و لایەنگرانی یەکیەتیمان YNDK، جوانترین پیرۆزبایتان ئاراستە دەکەین و خوازیاری ٧٠ ساڵەی خەباتتان ببێتە هەوێنی لەیەکتر نزیکبوونەوەو پێکهێنانی چەترێک بۆ پارتەکانی ڕۆژهەڵاتی کوردستان.
بەڕێزان: حیزبی دێموکراتی کوردستان لە ماوەی تەمەنی خەبات و تێکۆشانی لە ڕۆژهەڵاتی کوردستان وەک لایەنێکی سیاسی سەرەکی توانیویەتی ڕێبەرایەتی بزاڤی سیاسی و نەتەوەییمان لە ڕۆژهەڵاتی کوردستان بکات، ئەمەش وای کردوە حیزبەکەتان خاوەنی زۆرترین جەماوەری کوردستان بێت لەم بەشەی وڵات.
لەم قۆناغەی ئەمڕۆی کوردستان و ناوچەکەدا پێیدا تێپەڕ دەبێت، یەکڕیزی و کۆدەنگی تەواوی هێزو لایەنەکانی کوردستان لە هەموو کات زیاتر پێویستە بۆ وەدیهێنانی تەواوی مافەکانی گەلی کوردستان و هەنگاو نان بەرەو پێکهێنانی بەرەیەک یان چەترێک بۆ تەواوی نیشتمانپەروەر و پارتەکانی ڕۆژهەڵاتی کوردستان، بۆ ئەوەی لە کاتی دروستبوونی دەرفەت، ئەم بەشەی وڵاتیش رزگار بکرێ و هەنگاو بەرەو سەربەخۆیی کوردستان بنێین، لەو بۆنەیەتان‌دا جارێکی تر جەخت دەکەینەوە لەسەر زیاتر توندو تۆڵکردنی پەیوەندی برایانەی نێوانمان و تەواوی هێزو لایەنەکانی هەموو بەشەکانی کوردستان.
لەگەڵ رێزمان‌دا
مەکتەبی سیاسی یەکیەتیی نەتەوەیی دێموکراتی کوردستان
YNDK
