پارێزگای سنه له خولی ڕكه‌به‌رییه قاره‌مانییه‌كانی كۆنگ فوتوای سوننه‌تیی ئێران له قۆناغی لاوان و تازه‌لاواندا، پله‌ی یه‌كه‌می ئه‌م كێبڕكێیانه‌ی وه‌ده‌ست هێنا. به‌پێی ڕاپۆرتی هه‌واڵده‌ریی ئیسنا، ده‌یه‌مین خولی كێبڕكێكانی قاره‌مانیه‌تیی كۆنگ فوتوای سوننه‌تیی ئێران له دوو قۆناغی لاوان و مێرمنداڵان له پارێزگای ئه‌لبۆرز به‌ڕێوه‌چوو. له‌م كێبڕكێیانه‌دا كه له ڕۆژی ٢٩ی گه‌لاوێژ و بۆ ماوه‌ی ٣ ڕۆژ به‌رده‌وام بوو، ٢١٠ وه‌رزشكار له ١٧ پارێزگای ئێرانه‌وه به‌شدارییان كردبوو. یاریزانانی تیمی پارێزگای سنه له قۆناغی مێرمنداڵاندا كه بریتی بوون له محه‌ممه‌دفارووق ئه‌حمه‌دی، هێژا محه‌ممه‌دی، محه‌ممه‌دڕه‌زا سالاری و كاوان پیرخزری به كێشه‌كانی ٢٧, ٣٠, ٣٧ و ٤٥ كیلۆگڕه‌م، چوار میداڵی زێڕیان وه‌ده‌ست هێنا، هه‌ر له‌و تیمه‌دا ماهان قه‌وامی و فه‌ره‌یدوون دووستكام به كێشه‌كانی ٢٠ و ٢٤ كیلۆگڕه‌م میداڵی زێوی ئه‌م كێبڕكێیانه‌یان برده‌وه. له ئه‌نجامدا تیمی مێرمنداڵانی پارێزگای سنه پله‌ی یه‌كه‌می پێ به‌خشرا و پارێزگاكانی ورمێ و ئه‌لبۆرزیش له پله‌كانی دووهه‌م و سێهه‌مدا جێیان گرت. هه‌روه‌ها له تیمی لاوانی ئه‌م پارێزگایه‌دا، عه‌لی دجانی به كێشی ٣٥ كیلۆگڕه‌م، كاوان پارسا ٤٤ كیلۆگڕه‌م، محه‌ممه‌د مه‌عڕووفی ٥١ كیلۆگڕه‌م، هێمن كه‌ره‌می ٥٥ كیلۆگڕه‌م و ئه‌میر سه‌عیدی به كێشی ٥٩ كیلۆگڕه‌مه‌وه براوه‌ی میداڵی زێڕی ئه‌م كێبڕكێیانه بوون. هه‌روه‌ها له كێشی ٣٨ كیلۆگڕه‌مدا محه‌ممه‌د محه‌ممه‌دی، له كێشی ٤١ كیلۆگڕه‌مدا هاوار ڕۆشنی و له كێشی ٤٧ كیلۆگڕه‌میشدا فه‌ریبۆرز ڕه‌حمانی میداڵی زێویان وه‌ده‌ست هێنا و دوو كه‌سی دیكه‌ش به ناوه‌كانی ئه‌شكان بابایی و هیوا عه‌لی پوور به كێشی ٦٣ كیلۆگڕه‌مه‌وه توانیان میداڵی بڕۆنزی ئه‌م كێبڕكێیانه وه‌ده‌ست بێنن. تیمی پارێزگای سنه له‌م قۆناغه ته‌مه‌نییه‌شدا بوو به قاره‌مانی ده‌یه‌مین خولی كێبڕكێكانی كۆنگ فوتوای سوننه‌تیی ئێران و پارێزگای ورمێش پله‌ی دووهه‌می وه‌ده‌ست هێنا.
