لە ئاوایی گەشتاریی و ڕازاوەی ڕێژاو لە ناوچی داڵاهووی کرماشان یەکەمین فستیڤاڵی “میوەگەل بەهەشتی” بە بەشداریی خەڵکی ناوچەو گەشتیارانی بیانی بەڕێوەچوو.
ڕۆژی ٢٩ی گەلاوێژی ٩٨ی هەتاوی لە ئاوایی ڕێژاو کە بە پایتەختی هەنجیر لە ئێران ناسراوە، یەکەمین فستیڤاڵی میوە بەهشتییەکان لە کاتی پێگەیشتنی هەنجیر و زەیتونی ئەو ناوچە وەکوو فستیڤاڵێکی وەرزی و کەلتووەیی بەڕێوەچوو.
لەو فستیڤاڵەدا هاوکات لەگەڵ پێشاندانی بەروبوومی وەرزێڕان، کۆمەڵێک چالاکیی فەرهەنگی و هەنەریش بەڕیوەچوو، کە زیاتر سەرنجی مێوانان و بەشداربووانی ڕاکێشا.
بە گوتەی بەرپرسانی خۆجەیی ناوچەی داڵاهوو یەکەمین فستیڤاڵی میوەبەهەشتییەکانی ناوچەی ڕێژاو پێوەندی هەیە لەگەڵ پرۆژەی نیونەتەوەیی کرماشان لە ساڵی ٢٠٢٠ کە پرۆژەیەکە بە مەبەستی گەشەی ئابووری و فەرهەنگی لە پارێزگای کرماشان دەستی پێکردوە.
یەکێک لە دیمەنە جوانەکانی فستیڤاڵی میوەبەهەشتییەکان وەکوو زۆربەی فستیڤاڵە هاوشێوەکان لە ڕۆژهەڵاتی کوردستان ، بەشداری و ڕۆڵگێڕانی بەرچاوی کچان و ژنانی کورد بوو لەو چالاکییە فەرهەنگییەدا.
کچان و ژنانی ژەنیارو هونەرمەندی کورد بۆ جارێکی دیکە سەرنجی گەشتیاران و خەڵکی مێوانیان ڕاکێشا کە سەرەڕای بەربەستە حکومییەکان لەسەرڕێی چالاکیی هونەری و فەرهەنگییەکانی ژنان لە ئێران، بەڵام ژنی کورد و بەتایبەتی خەڵکی کوردی یارسان لە دەڤەری داڵاهوو، هونەری ژەنیاری و جلوبەرگی ڕەسەنی کوردی وەکوو چەکێک بەکار دێنن بەرانبەر بە هەرچەشنە هەڕەشەی فەرهەنگی.
هەروەها ڕۆژی ٢٥ی گەلاوێژی ٩٨ی هەتاوی دوو فستیڤاڵی کەلتووری و وەرزێڕی “خەرمان” و فستیڤاڵی”ئەسپی ڕەسەنی کوردی” لە ئاوایی “قومشەی سەیی یاقووب”ی مایدەشتی کرماشان بەڕێوەچوو.
شایانی باسە فستیڤاڵە وەرزی و کەلتوورییەکان کە چەندین ساڵە بە گەرمی وگۆڕی زیاترەوە لە ناوچە جیاجیاکانی کوردستان و، بە ماندووبوونی چالاکانی مەدەنی و کەسانی خەمخۆر بەڕێوەدەچێ، جیا لەوەی کە بەستێنێکە بۆ پێشاندانی کەلتووری و شارەستانیەتی گەلی کورد ، لە سەر ڕاکێشانی سەرنجی میدیاکان و گەشتیاران کاریگەریی ئەرینی داناوە.
