بەدوای ڕوودانی ئاگركەوتنەوە لە دار بەڕووەكانی شاری گیلان‌غەرب نزیكەی ١٠٠ هێكتار لە لێڕەوارە بەپیت‌و بەرەكەتەكانی ئەم ناوچەیە بوو بە خه‌ڵووز، هەروەها ١٦ هێكتار لە لەوەڕگەكانی شاری ماكۆش له ئاگردا سووتان.
جەببار وەلی پوور، بەرپرسی ئیدارەی سەرچاوە سرووشتییەكانی شاری گیلان‌غەرب، ڕێژەی زەرەرە و زیانەكانی ئەم ڕووداوانە له سۆنگه‌ی سوتانی دارستانە بەڕووەكانی ئەم شارەی تا ئاستی ٥٠٠ تا ٦٠٠ میلیۆن تمەن مەزندە كردووە‌و ده‌ڵێ بە شێوەی مام ناوەندی هەر ١ هێكتار لەم دارستانانە 5 میلیۆن تمەن خەسارەتیان بینیوە.
ڕەحمان وەهابزادە، بەڕێوەبەری گشتیی سەرچاوە سرووشتییەكانی ورمێش لەم بارەوە ده‌ڵێ ئەمساڵ ئاستی ئاگركەوتنەوە لە لەوەڕگە‌و دارستانەكانی ئەم پارێزگایە دوو هێندەی پێشتر زیادی كردووە.
وەهابزادە وێڕای هێنانە بەر باسی ئەم مەسەلە كە زۆربەی حاڵەتەكانی ئاگركەوتنەوەی ئەم پارێزگایە لە ناوچە سنووری و هەڵەمووتەكان ڕوویان داوە، گوتی: لەم بوارەوە پێویستییان بە ئیمكاناتی ئاگركووژێنەوەی هەوایی هەیە، بەڵام تا ئێستاش ئەو پارێزگایە لەو ئیمکاناتانه بێبە کراوە.
هەروەها ڕاپۆرتەكان لە شاری ماكۆ باس لەوە دەكەن كە پتر لە ١٦ هێكتار لە لەوەڕگەكانی ئەم ناوچەیەش لە ئاگردا سووتاون‌و ڕێژەی زیان و خەسارەتەكانی دوو حاڵەتی ئاگركەوتنەوە كە لە ماوەی 2 ڕۆژی ڕابردوودا كەوتە گیانی سرووشتی ئەم دەڤەرە، زیاتر لە ١٦ میلیۆن تمەن بووە.
