پەرەسەندنی نیگەرانییەکان لە چوونە سەرێی ئاماری تەڵاق لە ئیلام

کاربەدەستانی حکومی لە ئیلام دەڵێن لە چوونەسەرێی ئاماری تەڵاق لەو پارێزگایە نیگەرانن.
زارا هیممەتی، جێگری کاروباری کۆمەڵایەتیی بێهزیستیی ئیلام دەڵێ هۆکاری زۆربەی تەڵاق‌و هەڵوەشانی ژیانە هاوبەشەکان لە ٤ مانگی سەرەتای ئەمساڵ‌دا توشبوون بە ماددەی هۆشبەرو خیانەتی ژن‌و مێرد لە یەکتری بووە.
ئەو دەڵێ ساڵی ڕابردووش بێکاری، ئێعتیاد، خیانەتی ژن‌و مێرد بە یەکتری‌و خۆدزینەوەی پیاوان لە ئەرک وەخۆگری‌و بەڕێوەبردنی ژیانی هاوبەش هۆکاری سەرەکیی تەڵاق‌و لێک جیابوونەوەکان لە پارێزگای ئیلام بووە، بەڵام ئەوەندەی لەو ٤ مانگەی سەرەتای ساڵدا بەدی دەکرێ، ئاماری تەڵاق لە چاو ساڵی ڕابردوو ڕوو لە هەڵکشانە.
جێگری کاروباری کۆمەڵایەتیی بێهزیستیی ئیلام بێ ئەوەی بە وردی ئاماژە بە هۆکارە کۆمەڵایەتی‌و ئابووری‌یەکانی تەڵاق بکا، هۆکارێکی دیکەی تەڵاقی بۆ لێک‌تێنەگەیشتنی ژن‌و مێردە لاوەکان لەگەڵ یەکتری ئەوە گەڕاندۆتەوە.