پاش ئه‌وه‌ی چەکدارێکی هێزی ئینتیزامی به هۆی ته‌قه‌کردن لە کەسێکی خەڵکی کرماشان ناوبراوی کوشت، ده‌زگای قه‌زایی ئێران لە پێكهێنانی په‌روه‌نده‌ی بۆ ئه‌م ڕووداوە خۆی بواردوە.
به‌پێی ڕاپۆرتی ماف نیوز، پاش ئه‌وه‌ی كه لاوێكی كورد له شاری كرماشان به هۆی ته‌قه‌ی مه‌ئموورێكی هێزی ئینتزامی كوژرا، بنه‌ماڵه‌ی ئه‌م لاوه كورده سه‌ره‌تا له ڕێگه‌ی دادگای نیزامییه‌وه‌و پاشان له لایه‌ن ده‌زگای قه‌زایی پارێزگاوه به‌دواداچوونیان بۆ هۆكاری كوشتنی كوڕه‌كه‌یان كرد به‌ڵام هیچكام له دوو دادگایه وه‌ڵامی داواكارییه‌كانیان نه‌داوه‌ته‌وه.
سه‌رچاوه‌یه‌كی نزیك به‌م بنه‌ماڵه‌یه له كرماشان به هه‌واڵده‌ریی ماف نیوزی گوت ئه‌م دوو ده‌زگا حكومه‌تییه به بنه‌ماڵه‌ی كوژراوه‌كه‌یان ڕاگه‌یاندوه كه به هیچ شێوه‌یه‌ك په‌روه‌نده دژی ئه‌م مه‌ئمووره پێك ناهێنین‌و ئیدیعا ده‌كه‌ن كه ئەو ته‌نیا ئه‌ركی خۆی به‌جێ هێناوه.
پێشتر فه‌رمانده‌ی هێزی ئینتزامیی كرماشان ئیدیعای كردبوو كه ئه‌م لاوه له كاتی ده‌سبه‌سه‌ركردنیدا له‌گه‌ڵ هێزه ئینتزامییه‌كان به‌شه‌ڕ هاتووه‌و پاشان ڕای كردوه‌و ئه‌وانیش ته‌قه‌یان لێ كردوه، به‌ڵام بنه‌ماڵه‌و شایه‌تحاڵانی ئه‌م ڕووداوه قسه‌كانی ئه‌م فه‌رمانده‌یه‌یان وه‌درۆ خستۆته‌وه.
