بەبەشداریی یەکیەتیی لاوانی دێموکراتی رۆژهەڵاتی کوردستان کۆنفڕانسی ساڵانەی ئینتێرناسیۆنال سۆسیالیست لە شاری ئامەدی باکووری کوردستان بەڕێوەچوو.
سەرلەبەیانی رۆژی هەینی ٢٣ ی گەلاوێژ شاندی یەکیەتیی لاوان بە سەرپەرستیی پێشەوا عەلیپوور، سکرتێری گشتیی ئەو رێکخراویە لە کۆنفڕانسی لاوانی ئینتێرناسیۆناڵ سۆسیالیستدا بەشداربوون کە لە شاری ئامەدو لە ژێر ناوی “شەڕ دەکەین بۆ ئاشتی، عەدالەت بۆ هەموان”دا گیرا.
لە دەسپێکی کاری کۆنفڕانسدا جیهان گونەر، هاوسەرۆکی کۆما جەوانێن دێموکراتیک؛ خاتووسەلما ئیرماک، هاوسەرۆکی کۆنگرەی جڤاکا دێموکراتیک؛ ئەڤین ئینجیر، سکرتێری گشتیی لاوانی ئینتێر ناسیۆناڵ سوسیالیست؛ رائێد دێبی و نێمرود بارێنا هەردوو جێگری سەرۆکی لاوانی ئینتێر ناسیۆناڵ سۆسیالیست وتارو پەیامەکانی خۆیان بەو بۆنەیە پێشکێش کرد.
لە بڕگەیەکی دیکەی کاری کۆنفڕانسدا پاشان هەرکام لە رێکخراوەکانی بەشدار خوێندرایەوە کە لەم بەشەدا خاتوو بەیان چووکەڵی لە بەشی پێوەندییەکانی یەکیەتیی لاوان باسێکی لەسەر یەکیەتیی لاوانی دێموکراتی رۆژهەڵاتی کوردستان پێشکەش بە بەشداران کرد.
لە بڕگەیەکی دیکەی کاری کۆنفڕانسدا پێشەوا عەلی پوور، سکرتیری گشتیی یەکیەتیی لاوان لە باسێکدا باسی لە مێژووی یەکیەتیی لاوانو دۆزی کورد لە ئێرانو تێکۆشانی ٧٠ ساڵەی حیزبی دێموکراتی کوردستانو پڕۆژەی دامەزرانی کۆماری کوردستانو سیستێمی فێدڕاڵی بۆ ئێران کرد. لە پانێلی تایبەت بە بەشەکانی کوردستانیشدا سکرتێری گشتیی لاوان سەبارەت بە ئاڵۆزییەکانی رۆژهەڵاتی نێوەراستو دەوری پۆزێتیڤی لاوانی کورد دوا و گوتی: ئێمەی لاوانی كورد لەھەموو پارچەكانی كوردستان توانیمان نەریت شكێنییەك بكەینو لە ناوچەیەكی رەشدا بە سپی بمێنینەوە. لاوانی كورد لەھەموو لاوە بە ئایدیۆلۆژیای تووندڕەوی ئاینییو دەوڵەتی فاشیستی دەور دراون. كوردان لەلایەك بە خوێنڕێژترین رێكخراوی تیرۆریستی جیھان واتا داعش دەوردراونو لەلایەكی دیكەشەوە ھەرسێ دەوڵەتی شیعەی ئێرانو میراتگری ئەتاتوركو عوسمانیی توركیەو عێراقیش، باڵیان بەسەردا كێشاوە؛ بەڵام كەمترین كورد گیرۆدەی فیکری تووندڕەیی داعش بوونو، ژمارەی ئەو كوردانەی لەناو داعشدان زۆر له ژمارەی ئەو ئەورووپاییانەی لە نێو ئەو رێكخراوەیەدان كەمترەو ئەوە شانازیی و دەستكەوتێكی گەورەیە.
پێشەوا عەلیپوور گوتی ئەو دەستكەوتە فیکریو پراكتیكییە بەنرخە لەخۆوە دەست لاوی كورد نەكەوتووە، بەڵكوو فەلسەفەی خەباتی فیکریو سیاسیی كوردان ھەروا پاكو خاوێن و بۆ دادپەروەری و ئاشتی بووە. بەڵگەش بۆ ئەوە سەرۆك كۆماری یەكەم كۆماری كوردستان، پێشەوا قازی محەمەد لە ساڵی ١٩٤٦ كۆمارێكی میللی دێموكراتیكی لهناوچهیهکی پڕکێشهی جیهان دامەزراند كە تێیدا جولەكەو موسوڵمان و مەسیحی و ئەرمەنی بەیەكەوە دەژیان، لەو كۆمارەدا ژنان و لاوان لەریزی پێشەوەی خەبات بوون و سەرۆكەكەشی لەپێناو قەتڵوعام نەكردنی خەڵكەكەیو بۆ ئاشتی خۆی رادەستی پەھلەوی كرد و لەسێدارەدرا.
هەر لەم پانێلەدا نوێنەرانی لاوانی پارچەکانی دیکەی کوردستانیش ئاماژەیان بەو پاشخانە مێژوویی و مەعنەویەی رێبەرانی کورد بە گشتیو رێبەرانی دێموکرات بەتایبەتی دا، و رۆڵی سێ رێبەری نەمر قازی و قاسملوو و شەرەفکەندی لە سەردەمی خۆیانو کاریگەرییان لەسەر تێکۆشانی لاوانی سەردەمی ئێستادا باس کرد.
لە بڕگەیەکی تری کاری کۆنفڕانس، نوێنەرانی رێکخراوی لاوانی سۆسیال دێموکراتی سوئێد باسێکیان سەبارەت بە شێوازی کار و ساختار و تەشکیلاتی رێکخراوەکەیان پێشکەش بە ئامادە بوان کرد.
لە بڕگەی کۆتایی رۆژی یەکەمی کۆنفڕانس نوێنەرانی سۆسیال دێموکراتی ئیسڕائیلو فەلەستین باسێکی تێر و تەسەلیان سەبارەت بە کێشەی نێوان ئەم دوو وڵاتە پێشکەش کردو دوو لایەن کۆک بوون سەبارەت بەوەی کە کێشەی فەلەستین کاتێک چارەسەر دەبێ کە بە وڵاتێکی سەربەخۆ بناسرێت و ئەمە مافی هەموو نەتەوەیەکە، لەسەرووی هەموان گەلی کورد و گەلی فەلەستین.
شایانی باسە بەیان چوکەڵیو نەمام خوسرەوی لە بەشی پێوەندییەکانی یەکیەتیی لاوان هاورێیەتی سکرتیری گشتیی یەکیەتیی لاوانیان بۆ بەشداری لەو کۆنفڕانسە کردوە.
