٢٧ی جۆزەردانی ئەمساڵ ٣٩ساڵی تەواو بەسەر دامەزرانی ڕادیۆی دەنگی کوردستانی ئێراندا تێدەپەڕێ. به‌و بۆنه‌یه‌وه پڕبه‌دڵ پیرۆزبایی له هه‌موو خه‌ڵكی كوردستان به‌تایبه‌تی به‌ڕێوه¬به‌ران، لایه‌نگران و گوێگرانی به‌ئه‌مه‌گی ئه‌و ڕادیۆ خۆشه‌ویسته ده‌كه‌ین.
بۆ ئه‌وانه‌ی له كوردستان نه‌بوون یان له‌وێ بوون و ته‌مه‌نیان له په‌نجا ساڵ كه‌متره دامه‌زرانی ئه‌و ڕادیۆیه ڕووداوێكی ئاسایی‌یه: ده‌زگایه‌كی قسه‌بڵاوكردنه‌وه كه‌وتۆته كار كه له‌ڕێی شه‌پۆله‌كانی هه‌واوه به‌رنامه‌كانی بڵاو ده‌كاته‌وه و هه‌ركه‌س پێی خۆش بێ، ده‌توانێ له شوێنه‌كه‌ی خۆی به‌كۆمه‌گی ڕادیۆیه‌كی ته‌ڕانزیستۆری گوێ بۆ به‌رنامه‌كانی ڕابگرێ. به‌ڵام بۆ ئه‌وانه‌ی له كوردستان ژیاون و به‌تایبه‌تی ئه‌وكه‌سانه‌ی سه‌روكاریان ده‌گه‌ڵ بزووتنه‌وه‌ی ڕزگاریخوازانه‌ی كوردستانی ئێران هه‌بووه، دامه‌زرانی ڕادیۆی ده‌نگی كوردستان مانا و مه‌فهوومێكی دیكه‌ی هه‌یه و هه‌ربۆیه‌ش به ڕووداوێكی گرنگی مێژوویی¬ ده‌ژمێردرێ. با بزانین چۆن:
گه‌لێكی تێكۆشه‌ر و ئازادیخواز ته‌نیا به «گوناح»ی داواكردنی سه‌ره‌تاییترین مافه نه‌ته‌وه‌یی و ئینسانییه‌كانی له‌ماڵی خۆیدا و له‌سه‌رخاكی باب و باپیرانی له‌لایه‌ن ڕێژیمێكی زۆردار و ئینسانكوژه‌وه په‌لامار دراوه ، له ئیلامه‌وه تا ماكۆ له‌گه‌ڵ هێرشی دڕنده‌ترین هێزه سه‌ركوتكراوه‌كان به‌ره‌وڕوویه و ڕۆژانه ڕۆڵه‌ی ده‌كوژرێ، خوێنی ده‌مژرێ و قه‌ڵاچۆ ده‌كرێ. شه‌ڕه‌كه به‌وه‌نده‌وه نه‌وه‌ستاوه و گوند و شاره ئازادكراوه‌كان كه به‌رگرییه‌كی قاره‌مانانه‌ی ڕۆڵه پێشمه‌رگه‌كانی گه‌لیان تێدایه سیاسه‌تێكی یه‌كجار زاڵمانه‌یان له‌سه‌ر پیاده ده‌كرێ، قوتابخانه و ده‌ر‌مانگاكانیان داخراون و گه‌مارۆیه‌كی توندی ئابوورییان خراوه‌ته سه‌ر بۆئه‌وه‌ی نه‌ك هه‌ر خوارده‌مه‌نی، به‌ڵكوو ده‌رمانی نه‌خۆشان و شیری وشكی منداڵانیشیان پێ¬نه‌گا.
سه‌رباری هه‌موو ئه‌وانه ڕێژیمی ده‌سه‌ڵاتدار گه‌مارۆیه‌كی توندتری میدیایی خستۆته سه‌ر ناوچه ئازاده‌كان بۆ ئه‌وه‌ی هاواری مه‌زڵوومیه‌تی ئه‌و خه‌ڵكه و ده‌نگوباسی جینایه‌ته‌كانی كۆنه‌په‌رستی له‌لایه‌ك و ئازایه‌تی و قاره‌مانه‌تی و حه‌ماسه‌خوڵقێنیی پێشمه‌رگه و خۆڕاگریی بێوێنه‌ی كۆمه‌ڵانی خه‌ڵك له‌لایه‌كی دیكه‌وه به هیچ كوێی دنیا ڕانه‌گا.
له هه‌لومه‌رجێكی ئاوادا ڕۆژی ٢٧ی جۆزه‌ردانی ١٣٥٩ی هه‌تاوی به‌رامبه‌ر به ١٧ی ژوئه‌نی١٩٨٠ی زایینی ڕادیۆی ده‌نگی كوردستان، ده‌نگی هه‌قبێژی گه‌لی كورد به سروودی ئومێدبه‌خشی «ئه‌ی ڕه‌قیب» ده‌كرێته‌وه، شه‌وه‌زه‌نگی بێده‌نگی داده‌دڕێ و ترووسكه‌ی هیوا له دڵی پڕتاسه‌ی ئه‌ویندارانی ئازادیدا ده‌دره‌وشێنێته‌وه و په‌رده له سه‌ر ڕووی دزێوی دیكتاتۆری هه‌ڵده‌ماڵێ. ئیدی ده‌زگای ته‌بلیغاتیی ڕێژیمی ئاخوندی چیی دیكه وه‌ك تاقه مه‌یدانداری زانیاری¬گه‌یاندن نامێنێ و ده‌نگێكی ڕاستبێژی به‌ره‌ی ئازادی هه‌یه كه وه‌ڵامی پڕوپاگه‌نده‌ی ژه‌هراویی ده‌زگای هه‌واڵنێریی حكوومه‌تی ده‌داته‌وه و چه‌واشه‌كارییه‌كانی پووچه‌ڵ ده‌كاته‌وه.
هه‌ر ئه‌وانه‌ی ئه‌و هه‌لومه‌رجه‌یان دیوه و له نێو ڕووداوه‌كانیدا ژیاون ده‌زانن كه ڕادیۆی ده‌نگی كوردستانی ئێران چه‌ند خێرا كه‌لێنه ته‌بلیغاتی و ته‌شكیلاتییه‌كانی بۆ حیزبی دێموكڕاتی كوردستان پڕ كرده‌وه و چۆن وه‌ك كادرێكی شاره‌زا و حاڵ¬زان ڕۆژانه دوو جار و دواتر سێ جار له هه‌موو ماڵه كوردێكی شار و دێ وه‌ژوور ده‌كه‌وت. ئۆگریی خه‌ڵك به‌و ڕادیۆیه به‌ڕاده‌یه‌ك بوو كه هه‌زاران كه‌س هه‌ر بۆ بیستنی ئه‌و ده‌نگه ڕادیۆیان كڕی و له سه‌عاتی بڵاوبوونه‌وه‌ی ڕادیۆدا به نێو هه‌ر گوندێك و دوكان و بازاڕی هه‌ر شارێكی ناوچه ئازاده‌كاندا تێپه‌ڕیبای هه‌نگاوبه‌هه‌نگاو ده‌نگی رادیۆی ده‌نگی كوردستان به‌ڕێی ده‌كردی.
ڕێبه‌ری شه‌هید دوكتۆر قاسملوو هه‌روه‌خت سه‌ری پێڕسۆنێلی ڕادیۆی دابایه، ڕیزه ئامۆژگارییه‌كی ده‌كردن. یه‌كێك له گرنگترین ئامۆژگارییه‌كانی ئه‌وه بوو كه ده‌یگوت زمانتان خاوێن بێ، دروشمی نێوبه‌تاڵ مه‌ده‌ن و ڕۆژی جارێك ڕێژیم مه‌ڕووخێنن، پتر له‌وانه‌ش پێی له‌سه‌ر ڕاستوێژی داده‌گرت و ده‌یگوت له باسی ته‌له‌فاتی دوژمندا زێده‌ڕۆیی مه‌كه‌ن، چونكه دوژمن كه‌می لێ كوژرابن و ده‌قاوده‌ق خه‌به‌ره‌كه‌ی له ڕادیۆی ئێمه‌وه بڵاو بێته‌وه پتر زه‌نده‌قی ده‌چێ له‌وه‌ی زۆری لێ كوژرابێ و ئێوه ژماره‌كه زیاتر یان كه‌متر ڕابگه‌یه‌نن.
به‌كاربردنی ئه‌و ئامۆژگارییانه به‌جۆرێك متمانه‌ی له‌لای گوێگره‌كانی ڕادیۆ دروست كردبوو كه زۆرجار و له زۆر ناوچه مۆڵگه و پێگه‌كانی دوژمنیش به‌وردی گوێیان له به‌رنامه‌كانی ڕادیۆ و به‌تایبه‌تی هه‌واڵه‌كان ڕاده‌گرت. كاتێكیش كه‌سێك لێی ده‌پرسین بۆ وا ده‌كه‌ن؟ ده‌یانگوت چونكه خه‌به‌ره‌كانی ڕاست و باوه‌ڕپێكراون.
هه‌ر ئه‌م خۆشه‌ویستییه‌ی ڕادیۆ له‌لای كۆمه‌ڵانی خه‌ڵك بوو كه وای كردبوو هاونیشتمانانی كوردستان هه‌میشه له‌پشتی ڕاوه‌ستن و به هه‌موو شێوه‌یه‌ك بیپارێزن. دوژمن ڕقێكی كۆنه‌په‌رستانه‌ی زۆری له ڕادیۆی ده‌نگی كوردستان هه‌بوو، بۆیه به‌رده‌وام له‌فكری بۆردومانكردن و كپكردنیدا بوو. له‌به‌رامبه‌ر ئه‌وه‌دا پێرسۆنێلی ڕادیۆ و له‌گه‌ڵ ئه‌وانیش دڵسۆزانی گه‌لی كورد له گیان و ماڵ و ئیسڕاحه‌تی خۆیان بۆ پاراستنی ڕادیۆ مایه‌یان داده‌نا. به‌ڵگه‌ی ڕاستیی ئه‌م ئیددیعایه ئه‌وه‌یه كه رادیۆی ده‌نگی كوردستان له‌ماوه‌ی تێكۆشانی خۆیدا چه‌ند جار ناچار بوو جێگۆڕكه بكا و هه‌موو جارێ ده‌زگای چه‌ندسه‌د كیلۆیی ڕادیۆ و ماتۆربه‌رقی چه‌ندسه‌د كیلۆیی و یه‌ك‌تۆنی به شان و باهۆی ئه‌ویندارانی ئازادی ده‌گوازرانه‌وه و سه‌ره‌ڕای سه‌ختیی هه‌لومه‌رجه‌كه قه‌ت بۆ تاقه‌ڕۆژێكیش په‌كی به‌رنامه‌كانی نه‌كه‌وت.
له دامه‌زراندن و وه‌ڕێخستنی ڕادیۆی ده‌نگی كوردستاندا كه‌سانێكی زۆر نه‌خشیان هه‌بووه و ڕه‌نجیان كێشاوه كه هه‌موویان به نه‌مری له مێژووی حیزبی دێموكڕات و ڕادیۆی ده‌نگی كوردستاندا ده‌مێننه‌وه.
له ماوه‌ی چل ساڵ كاری ڕادیۆی ده‌نگی كوردستاندا به سه‌دان و بگره هه‌زاران تێكۆشه‌ری دێموكڕات له بواره جیاجیاكانی به‌ڕێوه‌به‌ری، نووسه‌ری، وه‌رگێڕی، بێژه‌ری و ته‌كنیكی و پارێزگاری و هتددا خزمه‌تیان تێدا كردوه و ئێستاش ئه‌و كاروانه پڕسه‌روه‌رییه هه‌ر به‌ڕێوه‌یه کە ده‌ستی هه‌موویان خۆش و یادی هه‌موویان به‌خێر.
ڕاسته پێشكه‌وتنی زانست و ته‌كنیك و ده‌ست¬ڕاگه‌یشتن به ئینته‌ڕنێت و ته‌له‌ڤزیۆن و ئامرازه نوێیه‌كانی پێوه‌ندی تا ڕاده‌یه‌ك نه‌خشی ڕادیۆیان كه‌مڕه‌نگ كردوه، به‌ڵام خزمه‌ته‌كانی ئه‌و ڕادیۆیه هه‌رگیز له‌به‌ر چاو ون نابن و نه‌خشی له ناساندنی بزووتنه‌وه ڕه‌واكه‌ی خه‌ڵكی كوردستاندا به نه‌مری ده‌مێنێته‌وه. یادی ٣٩ ساڵه‌ی دامه‌زرانی ڕادیۆی ده‌نگی كوردستان به خێر و سڵاو بۆ هه‌موو ئه‌وانه‌ی خشتێكیان له‌سه‌ر ئه‌و دیواره به‌رزه داناوه.
حیزبی دێموکراتی کوردستان
ناوەندی ڕاگەیاندن
٢٧/٣/١٣٨٩
