كاربەدەستانی هەواڵگریی ئامریكا دەڵێن بە تەواوی لەم بابەتە دڵنیان كە توانای ئەوەیان هەیە ڕاستیی ئیدیعای ئێران سەبارەت بە پێبەندبوون یان نه‌بوونیان بە بەڵێنییەكان ئه‌و رێژیمه لە ڕێككەوتنامەی ناوكی‌دا بسه‌لمێنن.
بەپێی ڕاپۆرتی هەواڵدەریی ئاسۆشێتێدپرێس، كاربەدەستانی ” سیا”، ڕێكخراوی هەواڵگریی ئامریكا ” ده‌ڵێن كە دەتوانن بە دڵنیاییەكی زۆرەوە، ئیدیعاكانی ئەم وڵاتە لە بارەی هەڵپەساردنی چالاكییە ناوكییەكانی بیسەلمێنن یان ڕەدی بكەنەوە.
سەرەڕای ئەوەی كە هێندێك لە ڕەخنەگرانی ڕێككەوتنامەی ناوەكی، بە پشتبەستن بە “هەڵسەنگاندنە خەوشدارەكان”ی رێکخراوی سیا وەك “لێکدانه‌وه‌ی هەڵە” لە بارەی بوونی چەكە كۆمەڵكووژەكان لە عێراق، ئەم ڕاگه‌یاندنه‌ی ناوه‌ندی هه‌واڵگریی ئه‌مریکا بە بێ بنەما دەزانن، بەڵام كاربەدەستانی ئەم ڕێكخراوەیه‌دەڵێن پشتیان بە ئیمكانات‌و توانای بێ وێنه‌ی خۆیان بۆ گرتنی پێوشوێنی چالاكییە ئەتۆمییەكانی ئێران بەستووەو دڵنیان دەتوانن ئەم كارە بكەن.
ده‌یوێد كۆهەن، جێگری ڕێكخراوی هەواڵگریی ناوەندیی ئامریكا ده‌ڵێ ئەركی ئێران ئەوەیە كە، بڕێکی یه‌کجار زۆرو كەم وێنەی زانیارییەكانی خۆیان لە بارەی هەموو لایەنەكانی چالاكیی ناوكیی وڵاته‌که‌یان بخه‌نه بەر دەستی پشكێنەران‌و ئەم كارە دەرفەتی بەرهەمهێنانی چەكی ئەتۆمی بۆ كۆماری ئیسلامی یەكجار بەرتەسك دەكاتەوە.
هەر لەم بارەوە ده‌یوید ئالبرایت، یەكێك لە پشكێنەرانی پێشووی نیزامی‌و سەرۆكی ڕێكخراوی زانستی ئەمنیەتی نێودەوڵەتیش ده‌ڵێ ئەم بابه‌ته لە بارەی ئێران جیاوازه له‌وه‌ی له عێڕاق ڕووی دا، چونكی ڕێكخراوە هەواڵگرییەكان پێشتر توانیویانە بنکه‌نهێنییەكان‌و نیرووگاكانی ئەم وڵاتە دەستنیشان بكەن‌و لە ماوەی ساڵانی ڕابردووشدا بارودۆخی زانیاری وەرگرتن لە بابەت ئێران زۆر زیاترو باشتر بووە.
