ڕەجەب تەیب ئەردۆغان، سەركۆماری توركیە ڕایگەیاندوه كە شێلگیرانە لە عەمەلیاتی نیزامی بەدژی هێزەكانی حیزبی كرێكارانی كوردستان (پ.ك.ك) بەردەوام دەبن.
ئۆردۆغان دهڵێ تا ئەم كاتەی كە دوایین هێزەكانی (پ.ك.ك) خاكی توركیە بەجێ نەهێڵنو چەكەكانیان دانەنێن، ئەم شەڕە درێژەی دەبێ.
سەركۆماری توركیە كە لە نێو گرووپێك لە كاربەدەستانی ناوچەیی لە كۆشكی سەركۆماردا قسەی بۆ دەكردن، وێڕای پێداگرتنەوە لە سەر ڕاگیرانی دانووستانەكانی ئاشتی لەگەڵ هێزە كوردییەكان، گوتی: لە عەمەلیاتەکانی بەدژی (پ.ك.ك)دا بەردەوام دەبن.
دانووستانەكانی ئاشتیی نێوان دەوڵەتی توركیەو پ.ك.ك لە سێ ساڵ لهوه پێشهوه دەستیان پێكرد، بەڵام ماوەیەك لەمەوبەر هاوكات لەگەڵ خولی نوێی شەو پێكدادانە نیزامییەكانی نێوان ئەم دوو لایەنە، ئەم دانووستانانە لە لایەن ئەردۆغانەوە ڕاگیرا.
ئەردۆغان لە درێژەی قسەكانیدا، زۆر بە توندی رهخنهی لە پارتی دێمۆكراتیكی گەل (HDP)، حیزبێك كە بەرگری لە مافی كوردهکانی تورکیه دەكا، گرت. ئهو گوتی پێویسته ئهو حیزبه سنووری خۆی لهگهڵ پ ک ک دیاری بکا.
پارتی دێمۆكراتیكی گەل لە هەڵبژاردنەكانی مەجلیسدا بە وەدەستهێنانی سەدی ١٣ی دەنگەكانو بردنهوهی ٨٠ كورسی لە نێو سەرجەم ٥٥٩ كورسسی پارلمانی توركیەدا، ڕێگری لە دەستڕاگەیشتنی حیزبی دەسەڵاتدار، پارتی دادو گهشه بە زۆرینەی دەنگەكان كرد.
ئانكارا لە ڕۆژی هەینی ٢ی گەلاوێژەوە دەستی بە شەڕ بە دژی تێرۆریسم كردووەو دهڵێ هاوكات شهڕی پ.ك.ك و گرووپی داعش دهکا، بەڵام لەو كاتەوە به کردهوه تا ئێستا ئەرتەشی توركیە ههر پ ک ک ی کردۆته ئامانجو بە دەیان جار هێرشی ئاسمانیی كردۆتە سەر بنكە و بارەگاكانی پ.ك.ك و بە خەستی بۆمبارانی کردوون.